മാരുതിക്കൊപ്പം എംജി മോട്ടോഴ്സും മഹീന്ദ്രയും; ഏപ്രില്‍ മാസത്തില്‍ രാജ്യത്ത് ഒരൊറ്റ വാഹനംപോലും വിറ്റില്ല

മുംബൈ: കൊറോണ വൈറസിന്റെ വ്യാപനം തടയുന്നതിനായി ലോക്ക് ഡൗൺ പ്രഖ്യാപിച്ചതിനെ തുടർന്ന് രാജ്യത്തെ വാഹന വിപണമേഖല കനത്ത പ്രതിസന്ധിയാണ് നേരിടുന്നത്. ലോക്ക് ഡൗണിനെ തുടർന്ന് ഡീലർഷിപ്പ് ഷോറൂമുകൾ അടച്ചിട്ടതിനാൽ ഏപ്രിൽ മാസത്തിൽ രാജ്യത്ത് ഒരൊറ്റ വാഹനംപോലും വിറ്റില്ലെന്ന് എംജി മോട്ടോഴ്സ് അറിയിച്ചു.

ചില്ലറ വിൽപ്പന കണക്കുകൾ പ്രകാരം ഏപ്രിൽ മാസത്തിലെ റീട്ടെയിൽ വിൽപ്പനയിൽ പൂജ്യം രേഖപ്പെടുത്തിയതായി എംജി മോട്ടോർ ഇന്ത്യ പുറത്തിറക്കിയ പ്രസ്താവനയിൽ വ്യക്തമാക്കി. ഏപ്രിൽ അവസാനവാരത്തിൽ ഗുജറാത്തിലെ ഹലോലിൽ ചെറിയ രീതിയിൽ നിർമാണ പ്രവർത്തനങ്ങൾ എംജി മോട്ടോഴ്സ് തുടങ്ങിയിരുന്നു.

എംജി മോട്ടോഴ്സിനെ കൂടാതെ പ്രധാന വാഹന നിർമാതാക്കളായ മഹീന്ദ്രയും ഏപ്രിലിൽ രാജ്യത്ത് ഒരൊറ്റ വാഹനംപോലും വിറ്റില്ലെന്ന് അറിയിച്ചു. കൊവിഡ് -19നും ഇതിനെ തുടർന്നുള്ള ദേശീയ ലോക്ക് ഡൗണും ഏപ്രിൽ മാസത്തിൽ വാഹനങ്ങളുടെ ആഭ്യന്തര വിൽപ്പനയെ സാരമായി ബാധിച്ചുവെന്ന് കമ്പനി പുറത്തിറക്കിയ പ്രസ്താവനയിൽ പറഞ്ഞു. അതേസമയം, കഴിഞ്ഞ മാസം 733 വാഹനങ്ങൾ വിദേശ വിപണികളിലേക്ക് കയറ്റി അയച്ചതായി കമ്പനി വ്യക്തമാക്കി.

Also Read: മാരുതി സുസൂക്കിയുടെ ചരിത്രത്തിലാദ്യമായി ഒരു വിൽപ്പനയും രേഖപ്പെടുത്താത്ത ഏപ്രിൽ മാസം

ലോക്ക് ഡൗൺ കഴിയുന്നതോടെ വിപണി ആരംഭിക്കുമെന്നും, ഡീലർമാരും വിതരണക്കാരും അടങ്ങുന്ന പങ്കാളികൾക്കൊപ്പം വീണ്ടും കൈകോർത്ത് പ്രവർത്തിക്കുമെന്നും എം & എം ഓട്ടോമോട്ടീവ് ഡിവിഷൻ ചീഫ് എക്സിക്യൂട്ടീവ് ഓഫീസർ വീജയ് നക്ര പറഞ്ഞു. നേരത്തെ മാരുതി സുസൂക്കിയും ആഭ്യന്തര വിൽപ്പന പൂജ്യമായി രേഖപ്പെടുത്തിയെന്ന് കാണിച്ച് രംഗത്തെത്തിയിരുന്നു.

മാരുതി സുസൂക്കിയുടെ ചരിത്രത്തിലാദ്യമായാണ് ഒരു വിൽപ്പനയും രേഖപ്പെടുത്താത്ത ഏപ്രിൽ മാസം കടന്നുപോകുന്നത്. അതേസമയം, മുഴുവൻ സുരക്ഷാ മാനദണ്ഡങ്ങളും പാലിച്ച് മുന്ദ്ര പോര്‍ട്ട് വഴി 632 വാഹനങ്ങള്‍ കയറ്റിയയച്ചതായി കമ്പനി അറിയിച്ചു.