ബിൽ ഗേറ്റ്സ്-മെലിൻഡ വിവാഹമോചനത്തിന്റെ പ്രധാന കാരണം
ബിൽ ഗേറ്റ്സുമായുള്ള വിവാഹജീവിതം അവസാനിപ്പിക്കുന്നതിനായി 2019 മുതൽ വിവിധ അഭിഭാഷകരുമായി മെലിൻഡ ഗേറ്റ്സ് കൂടിക്കാഴ്ച നടത്തിയിരുന്നു. പ്രായപൂർത്തിയാകാത്ത പെൺകുട്ടികളെ ലൈംഗികമായി പീഡിപ്പിച്ച കേസിൽ ശിക്ഷിക്കപ്പെട്ട ജെഫ്രി എഡ്വേർഡ് എപ്സ്റ്റീൻ എന്നയാളുമായുള്ള ബിൽ ഗേറ്റ്സിന്റെ ബന്ധമായിരുന്നു ഇതിന് പിന്നിൽ. ജെഫ്രി എപ്സ്റ്റീനുമായുള്ള ബിൽ ഗേറ്റ്സിന്റെ ബന്ധത്തിൽ മെലിൻഡ ആശങ്കപ്പെട്ടിരുന്നതായും വാൾസ്ട്രീറ്റ് ജേണൽ (ഡബ്ല്യുഎസ്ജെ) റിപ്പോർട്ട് ചെയ്തു. ഇതുമായി ബന്ധപ്പെട്ട് 2019 ഒക്ടോബറിൽ നിരവധി സ്ഥാപനങ്ങളിൽ നിന്നുള്ള അഭിഭാഷകരുമായി മെലിൻഡ സംസാരിക്കുകയുണ്ടായി.
വിവാഹബന്ധം തിരിച്ചെടുക്കാനാവാത്തവിധം തകർന്നുവെന്ന് അവർ സമ്മതിക്കുകയും ചെയ്തിരുന്നു. ബിൽ ഗേറ്റ്സിന് എപ്സ്റ്റീനുമായുള്ള ബന്ധത്തെക്കുറിച്ച് 2013 മുതൽ മെലിൻഡയ്ക്ക് അറിയാമായിരുന്നുവെന്നും ഇതിൽ അവർ അസ്വസ്ഥതയായിരുന്നുവെന്നും റിപ്പോർട്ട് പറയുന്നു. അതേസമയം ബിൽഗേറ്റ്സും ജെഫ്രി എപ്സ്റ്റീനുമായി പലതവണ കൂടിക്കാഴ്ച നടത്തിയിരുന്നതായും ന്യൂയോർക്ക് ടൗൺ‌ഹൗസിൽ താമസിച്ചിരുന്നതായും കഴിഞ്ഞ വർഷം ന്യൂയോർക്ക് ടൈംസ് റിപ്പോർട്ട് ചെയ്തിരുന്നു. അന്ന് ആ കൂടിക്കാഴ്ച്ചയെ മനുഷ്യസ്‌നേഹമാണെന്നായിരുന്നു ബിൽ ഗേറ്റ്സിന്റെ വക്താവ് വിശേഷിപ്പിച്ചിരുന്നത്.
ബിൽ ഗേറ്റ്സ്- മെലിൻഡ വിവാഹമോചനം
കഴിഞ്ഞ ആഴ്ചയായിരുന്നു ബിൽ ഗേറ്റ്സും മെലിൻഡയും തമ്മിൽ വേ‍ർപ്പിരിഞ്ഞത്. സോഷ്യൽ മീഡിയയിലൂടെ ബിൽഡ ഗേറ്റസും മെലിൻഡയും തന്നെയായിരുന്നു വിവാഹമോചന വാർത്ത പങ്കുവച്ചത്. സന്നദ്ധ, ജീവകാരുണ്യ മേഖലകളിൽ പ്രവർത്തിച്ചുവരുന്ന ഇവരുടെ സ്ഥാപനമായ ബിൽ ആൻഡ് മെലിൻഡ ഗേറ്റ്സ് ഫൗണ്ടേഷന്റെ കാര്യങ്ങളിൽ ഇരുവരും ഒരുമിച്ച് പ്രവർത്തിക്കുമെന്നും അറിയിച്ചിരുന്നു. വിവാഹ മോചന വായർത്തകൾ പുറത്തുവന്നതിന് പിന്നാലെ ഇരുവരുടെയും പേരിലുള്ള 100 ലക്ഷം കോടി രൂപയുടെ സ്വത്തുക്കൾ തുല്യമായി പങ്കുവയ്ക്കാനുള്ള നടപടികൾ ആരംഭിച്ചതായും റിപ്പോർട്ടുകളുണ്ടായിരുന്നു.
ആരായിരുന്നു ജെഫ്രി എഡ്വേർഡ് എപ്സ്റ്റീൻ?
ലൈംഗിക ചൂഷണത്തിനും ആക്രമണത്തിനും ശിക്ഷിക്കപ്പെട്ട ഒരു അമേരിക്കൻ ധനകാര്യ വിദഗ്ധനായിരുന്നു ജെഫ്രി എഡ്വേർഡ് എപ്സ്റ്റീൻ. പ്രായപൂർത്തിയാകാത്ത പെൺകുട്ടികളെ ഇയാൾ ലൈംഗിക അടിമകളായി വയ്ക്കുകയും വിൽക്കുകയും ചെയ്തിരുന്നു. പെൺകുട്ടികളെ ലൈംഗിക ചൂഷണങ്ങൾക്ക് വിൽക്കുന്നതിനായി വിപുലമായൊരു ശൃംഖല തന്നെ ഇയാൾ നടത്തിയിരുന്നു. ലൈംഗിക കടത്തുമായി ബന്ധപ്പെട്ട ഫെഡറൽ ആരോപണങ്ങളിൽ വിചാരണ കാത്തിരിക്കുന്നതിനിടെ 2019 ഓഗസ്റ്റിൽ എപ്സ്റ്റീൻ ആത്മഹത്യ ചെയ്യുകയായിരുന്നു. 66-ാം വയസ്സിൽ ജയിലിൽ വച്ചായിരുന്നു ജീവനൊടുക്കിയത്.