മുഴുവൻ ജീവനക്കാർക്കും 1.11 ലക്ഷം രൂപയോളം ബോണസ്; ഞെട്ടിച്ച് ടെക്ക് ഭീമൻ !!

ഡൽഹി: കൊവിഡ് പ്രതിസന്ധിക്കിടെ ജീവനക്കാർക്ക് കൈത്താങ്ങായി ലോകത്തിലെ പ്രമുഖ ടെക് കമ്പനിയായ മൈക്രോസോഫ്റ്റ്. കോർപ്പറേറ്റ് വൈസ് പ്രസിഡന്റ് ലെവലിന് താഴെയുള്ള എല്ലാ ജീവനക്കാർക്കും കൊവിഡ് ബോണസ് എന്ന പേരിൽ കമ്പനി 1,500 ഡോളർ ( ഏകദേശം 1.11 ലക്ഷം രൂപയോളം) ബോണസായി നൽകും.

2021 മാർച്ച് 31നോ അതിന് മുമ്പോ കമ്പനിയിൽ ചേർന്നവർക്കാണ് ബോണസ് തുക ലഭിക്കുക. പാർട്ട് ടൈം ജോലിക്കാർക്കും മണിക്കൂറിന് അനുസരിച്ച് ശമ്പളം കൈപ്പറ്റുന്നവർക്കും ബോണസ് നൽകുമെന്ന് മൈക്രോസോഫ്റ്റ് ചീഫ് പീപ്പിൾ ഓഫീസർ കാത്‌ലീൻ ഹൊഗാൻ പറഞ്ഞു. അമേരിക്ക ഉൾപ്പടെ ലോകത്തുടനീളം യോഗ്യതയുള്ള എല്ലാ ജീവനക്കാർക്കും ബോണസ് ലഭ്യമാക്കും. നിലവിൽ ലോകത്താകമാനം 175,508 പേരാണ് മൈക്രോസോഫ്റ്റിൽ ജോലി ചെയ്യുന്നത്.

Also Read: വ്യക്തിഗത വായ്പകൾക്ക് കഴുത്തറുപ്പൻ പലിശ നൽകേണ്ട; കുറഞ്ഞ പലിശ നിരക്കിൽ ബാങ്കുകൾ ലോൺ തരും

മൈക്രോസോഫ്റ്റിന്റെ അനുബന്ധ സ്ഥാപനങ്ങളായ ലിങ്ക്ഡ്ഇൻ, ജിറ്റ്ഹബ്, സെനിമാക്സ് എന്നിവിടങ്ങളിലെ ജീവനക്കാർക്ക് ഈ ബോണസ് ബാധകമല്ല. കൊവിഡ് പകർച്ചവ്യാധി ആരംഭിച്ചത് മുതൽ നിരവധി കമ്പനികളാണ് ഇത്തരത്തിൽ ജീവനക്കാർക്ക് ബോണസ് തുക വിതരണം ചെയ്തത്. ജനുവരിയിൽ ലോകമെമ്പാടുമുള്ള 1.7 ലക്ഷം ജീവനക്കാർക്ക് ബാങ്ക് ഓഫ് അമേരിക്ക ബോണസ് നൽകിയിരുന്നു. ഇന്ത്യയിലെ 24,000 പേർക്കാണ് ഇതിന്റെ ആനുകൂല്യം ലഭിച്ചത്. ഓരോരുത്തർക്കും 750 ഡോളർ വീതമാണ് നൽകിയത്. അതായത് ഏകദേശം 55,000 രൂപയിലുമധികം തുക.