ദുബായില്‍ കോടികൾ വിലവരുന്ന ആഡംബര വസതി സ്വന്തമാക്കി മോഹന്‍ലാല്‍

ദുബായ്: ദുബായിൽ പുതിയൊരു വീട് സ്വന്തമാക്കി നടൻ മോഹൻലാൽ. വീടിന്റെ ഗൃഹപ്രവേശന ചടങ്ങുമായി ബന്ധപ്പെട്ട് മോഹൻലാലും ഭാര്യ സുചിത്രയും ദുബായിൽ എത്തി. ആര്‍പി ഹൈറ്റ്‌സിലാണ് താരം തന്റെ ഏറ്റവും പുതിയ ആഡംബര അപ്പാര്‍ട്‌മെന്റ് സ്വന്തമാക്കിയിരിക്കുന്നത്. ദുബായിലെ ഏറ്റവും ആകർഷകമായ ലൊക്കേഷനിലാണ് ആർപി ഹൈറ്റ്സ് സ്ഥിതി ചെയ്യുന്നത്. പുതിയ വീടിന്റെ ചിത്രങ്ങൾ സോഷ്യൽ മീഡിയയിൽ വൈറലാണ്.

താരത്തിന്റെ പുതിയ വീട് മനോഹരമായ വാൾപേപ്പറുകളും വുഡൻ ഫ്ളോറിങ്ങും നീളത്തിലുള്ള ബാല്‍ക്കണിയുമാൽ സമൃദ്ധമാണ്. വെള്ള നിറത്തിലുള്ള പെയിന്റ് ആണ് വീടിന് പൂശിയത്. വീട് ധാരാളം ഇന്റീരിയര്‍ പ്ലാന്റ്‌സും പെയിന്റിങ്ങുകളും കൊണ്ട് അലങ്കരിച്ചിട്ടുണ്ട്. 50 നിലകളിലായി 300 മീറ്ററാണ് കെട്ടിടത്തിന്റെ ഉയരം.


ഏറ്റവും വലിയ ഷോപ്പിങ് കോംപ്ലക്‌സായ ദുബായ് മാളിന്റെ തൊട്ടടുത്താണ് അപ്പാർട്മെന്റ് കോംപ്ലക്സ് സ്ഥിതി ചെയ്യുന്നത്. 1.3 മില്യൻ ദിർഹം മുതലാണ് ആർപി ഹൈറ്റ്സിലെ അപ്പാർട്മെന്റിന്റെ വില ആരംഭിക്കുന്നത്. അതായത് ഏകദേശം 2.6 കോടി രൂപ. പ്രമുഖ മലയാളി വ്യവസായി രവി പിള്ളയുടെ ഉടമസ്ഥതയിലുള്ള നിർമ്മാണകമ്പനിയാണ് ആർപി ഹൈറ്റ്സ്.

Also Read: ലോകത്തിലെ ഏറ്റവും ചെലവേറിയ അഞ്ച് ആഡംബര മണിമാളികകൾ, മുകേഷ് അംബാനിയുടെ ആന്റിലിയ രണ്ടാമത്

ദുബായ് കാഴ്ച്ചകള്‍ ആസ്വദിക്കാവുന്ന വിധത്തില്‍ മനോഹരമായ ബാല്‍ക്കണിയാണ് വീട്ടിലുള്ളത്. ഒപ്പം വീടിന്റെ ഒരുവശത്തു നിന്ന് ബുര്‍ജ് ഖലീഫയിലേക്കുള്ള കാഴ്ച്ചകള്‍ കാണാനാകും. വെറും എട്ട് മിനിട്ടുകൊണ്ട് ബുര്‍ജ് ഖലീഫയില്‍ എത്താനുമാകും.


ദുബായ് സൗത്തിലേക്ക് 38 മിനിട്ടും പാം ജുമൈറയിലേക്ക് 26 മിനിട്ടും ബുല്‍ അല്‍ അറബിലേക്ക് 20 മിനിട്ടും ദുബായ് അന്താരാഷ്ട്ര വിമാനത്താവളത്തിലേക്ക് 17 മിനിട്ടും ഡ്രൈവ് ചെയ്യാനുള്ള ദൂരമേയുള്ളു. 2011ൽ ബുര്‍ജ് ഖലീഫയിലും മോഹന്‍ലാല്‍ അപ്പാര്‍ട്‌മെന്റ് സ്വന്തമാക്കിയതായി വാര്‍ത്തകള്‍ പുറത്തുവന്നിരുന്നു.