കൊവിഡിൽ വലഞ്ഞ മഹാരാഷ്ട്രയ്ക്ക് ആശ്വാസമേകാൻ മുകേഷ് അംബാനി; സൗജന്യ ഓക്സിജൻ എത്തിക്കും

മുംബൈ: കൊവിഡ്-19 രണ്ടാംതരംഗത്തിൽ പ്രതിസന്ധിയിലായ മഹാരാഷ്ട്രയെ കരകയറ്റാൻ സൗജന്യ ഓക്സിജൻ വാഗ്ദാനം ചെയ്ത് ഇന്ത്യയിലെ ശതകോടീശ്വരനും റിലയൻസ് ഇൻഡസ്ട്രീസ് ചെയർമാനുമായ മുകേഷ് അംബാനി. കൊവിഡിനെതിരെ പോരാടാൻ മഹാരാഷ്ട്രയിലെ ആശുപത്രികളിലേക്ക് റിലയൻസ് റിഫൈനറികളിൽ ഉൽ‌പാദിപ്പിക്കുന്ന ഓക്സിജൻ ആണ് മുകേഷ് അംബാനി എത്തിക്കുക. ലോകത്തെ ഏറ്റവും വലിയ പെട്രോളിയം റിഫൈനറി സ്ഥാപനമായ അംബാനിയുടെ റിലയന്‍സ് ഇന്‍ഡസ്ട്രീസ് ലിമിറ്റഡ് ഇതിനകം തന്നെ ഗുജറാത്തിലെ ജാംനഗര്‍ മുതല്‍ മഹാരാഷ്ട വരെയുള്ള മേഖലയില്‍ സൗജന്യമായി ഓക്‌സിജന്‍ വിതരണം ആരംഭിച്ചിട്ടുണ്ടെന്നും റിലയന്‍സ് വക്താവ് അറിയിച്ചു.

റിലയൻസിൽ നിന്ന് മഹാരാഷ്ട്രയ്ക്ക് 100 ടൺ ഗ്യാസ് ലഭിക്കുമെന്ന് നഗരവികസന മന്ത്രി ഏകനാഥ് ഷിൻഡെ ട്വീറ്റ് ചെയ്തു. രാജ്യത്ത് കൊവിഡ് ഏറ്റവും രൂക്ഷമായി ബാധിച്ച സംസ്ഥാനമാണ് മഹാരാഷ്ട്ര. സംസ്ഥാനത്ത് ഇതുവരെ 35,78,160 കേസുകൾ ആണ് റിപ്പോർട്ട് ചെയ്തിട്ടുള്ളത്. ഏറ്റവും കൂടുതൽ മരണവും റിപ്പോർട്ട് ചെയ്ത സംസ്ഥാനവും മഹാരാഷ്ട്രയാണ്. സംസ്ഥാനത്ത് ഇതുവരെ 58,804 പേരാണ് കോവിഡ് ബാധിച്ച് മരിച്ചത്. മുകേഷ് അംബാനിയുടെ ഔദ്യോഗിക വസതി മുംബൈയിലാണ്. അദ്ദേഹത്തിന്റെ ബിസിനസ് സാമ്രാജ്യവും ഇവിടെതന്നെയാണ്.

Also Read: ദേശീയ പെന്‍ഷന്‍ പദ്ധതിയില്‍ ചേരാനുള്ള പ്രായപരിധി 70 ആക്കിയേക്കും

അതേസമയം കൊവിഡിന്റെ രണ്ടാം തരംഗത്തിൽ വിറങ്ങലടിച്ച ഇന്ത്യയിൽ ഓക്സിജന്റെയും ആശുപത്രി കിടക്കകളുടെയും കുറവ് മൂലമാണ് നിരവധി രോഗികൾ മരിക്കുന്നതായി മാധ്യമങ്ങൾ റിപ്പോർട്ട് ചെയ്യുന്നുണ്ട്. ശ്മശാനങ്ങൾ നിറഞ്ഞതോടെ ഡൽഹി ഉൾപ്പടെയുള്ള സംസ്ഥാനങ്ങളിൽ മൈതാനങ്ങൾ ശ്മശാനങ്ങളായി. ചികിത്സ കിട്ടാതെ മരണപ്പെടുന്നവരുടെ എണ്ണം കൂടുന്നതായും റിപ്പോർട്ടുകളുണ്ട്.