കുതിച്ചുയർന്ന് റിലയൻസ് ഓഹരികൾ; സമ്പന്ന പട്ടികയിലും മുന്നിലെത്തി മുകേഷ് അംബാനി

കൊച്ചി: കൊറോണക്കാലത്ത് ചുറ്റുമുള്ള ബിസിനസുകൾ തകർന്ന് വീണപ്പോഴും കാര്യമായ പ്രത്യാഘാധങ്ങൾ ഉണ്ടാകാൻ പ്രത്യേകം ശ്രദ്ധിച്ചു ഏഷ്യയിലെ ഏറ്റവും വലിയ സമ്പന്നനായ മുകേഷ് അംബാനി. 58 ദിവസം കൊണ്ട് അദ്ദേഹത്തിൻെറ സമ്പാദ്യത്തിൽ ഉണ്ടായ വർധന 2,200 കോടി ഡോളറാണ്. ഡിജിറ്റൽ ബിസിനസായ ജിയോ പ്ലാറ്റ് ഫോംസിലൂടെയാണ് അദ്ദേഹം വൻ തോതിൽ വിദേശ നിക്ഷേപം ആകർഷിച്ചത്.

റിലയൻസ് ജിയോയിലേക്ക് കുതിച്ച വിദേശ നിക്ഷേപം റിലയൻസ് ഇൻഡസ്ട്രീസ് ഓഹരികൾക്കും കുതിപ്പേകി. ഒൻപത് വർഷത്തിനു ശേഷം ആഗോള സമ്പന്ന പട്ടികയിൽ ആദ്യ പത്തു സ്ഥാനത്തേയ്ക്ക് മുകേഷ് അംബാനി എത്തിയിരിക്കുകയാണ്. ഒൻപതാം സ്ഥാനത്തായിരുന്ന അംബാനി 2008-ൽ പട്ടികയിൽ അഞ്ചാം സ്ഥാനത്ത് ആയിരുന്നു.

Also Read: ലോക സമ്പന്നരുടെ പട്ടികയിൽ മുകേഷ്‌ അംബാനി ഒമ്പതാം സ്ഥാനത്ത്‌

സമ്പൂർണ കട രഹിത കമ്പനിയായി പ്രഖ്യാപിച്ചതോടെ റിലയൻസ് വിപണി മൂല്യം 11 ലക്ഷം കോടി രൂപ കടന്നിരുന്നു.കമ്പനിയുടെ ഓഹരികളുടെ മൂല്യം 15,000 കോടി ഡോളർ കടന്നും കുതിയ്ക്കുകയാണ്. മാർച്ച് 23ന് 867.82 രൂപ എന്ന നിലവാരത്തിൽ ആയിരുന്നു ഓഹരി വില. പിന്നീട് കുതിച്ചുയരുകയായിരുന്നു.

ഇന്ന് വ്യാപാരം തുടങ്ങിയപ്പോൾ വില അൽപ്പം ഇടിഞ്ഞിട്ടുണ്ടെങ്കിലും 1728.30 രൂപ എന്ന നിലവാരത്തിലാണ് ഓഹരി വില. അടുത്ത മാസം അഞ്ചു ശതമാനം മുതൽ എട്ടു ശതമാനം വരെ നേട്ടം റിലയൻസ് ഓഹരികൾ നൽകും എന്നാണ് ഈ രംഗത്തെ വിദഗ്ധരുടെ നിരീക്ഷണം.