കൊവിഡ് കാലത്ത് കുതിച്ചുയര്‍ന്ന് സ്വര്‍ണ പണയ വായ്പകൾ; മുത്തൂറ്റിന് 16 ശതമാനം വായ്പാ വര്‍ധന

കൊച്ചി: കൊവിഡ് കാലത്ത് ഗോൾഡ് ലോണുകൾ കുതിച്ചുയരുന്നു. മുത്തൂറ്റ് ഫിനാൻസ് ഗോൾഡ് ലോണുകളിലും വര്‍ധന. മുത്തൂറ്റ് കൈകാര്യം ചെയ്യുന്ന മൊത്തം വായ്പകൾ നടപ്പു സാമ്പത്തിക വര്‍ഷത്തിൻെറ ആദ്യ ത്രൈമാസത്തിൽ 16 ശതമാനം വര്‍ധിച്ചു. വാര്‍ഷികാടിസ്ഥാനത്തിൽ ആണിത്. 46,501 കോടി രൂപയായി ആണ് മൊത്തം വായ്പകൾ ഉയര്‍ന്നത്. മുൻ വര്‍ഷം ഇത് 40,228 കോടി രൂപയായിരുന്നു.

അതേസമയം ലോക്ക്ഡൗൺ മൂലം ഈ ത്രൈമാസത്തിൽ കൈകാര്യം ചെയ്യുന്ന ആകെ വായ്പാ ആസ്തികളില്‍ 370 കോടി രൂപയുടെ ഇടിവുണ്ടായിട്ടുണ്ട്. നികുതിക്കു ശേഷമുള്ള ലാഭം 52 ശതമാനം വര്‍ധിച്ച് 858 കോടി രൂപയായി. കഴിഞ്ഞ വര്‍ഷം ഇത് 563 കോടി രൂപ ആയിരുന്നു.

Also Read: മുത്തൂറ്റ് ഓഹരി വില കുതിച്ചുയരുന്നു

ബിസിനസിൻെറ തുടര്‍ച്ചയ്ക്കായി ബിസിനസ് സംവിധാനങ്ങൾ മെച്ചപ്പെടുത്തിയതിനാൽ ഡിജിറ്റൽ സ്വര്‍ണ പണയ വായ്പാ വിതരണത്തിൽ നാലു മടങ്ങു വര്‍ധനയുണ്ടായതായി മുത്തൂറ്റ് ഗ്രൂപ്പ് ചെയര്‍മാൻ എം.ജി ജോര്‍ജ് മുത്തൂറ്റ് വ്യക്തമാക്കി.

ഡിജിറ്റൽ ഉപയോഗം പ്രോൽസാഹിപ്പിക്കാനായി ഓൺലൈൻ സംവിധാനങ്ങളിലൂടെ പലിശ അടക്കുന്നവര്‍ക്ക് കാഷ്ബാക്ക് പദ്ധതി മുത്തൂറ്റ് പ്രഖ്യാപിച്ചിരുന്നു. ജൂൺ മുതൽ ജൂലൈയിലും ആഗസ്റ്റിലും ലോണുകളിൽ വര്‍ധനയുണ്ട്. മൊത്തം വായ്പകളുടെ 12 ശതമാനം സ്വര്‍ണ പണയ ഇതര വായ്പകളാണ്. കൊവിഡ് കാലത്ത് ഗോൾഡ് ലോൺ ഇതര ലോണുകളിലും വര്‍ധനയുണ്ട്.