രാജ്യത്ത് വീണ്ടും ലോക്ക് ഡൗണ്‍ പ്രഖ്യാപിക്കുമോ? സമ്പദ‍്‍വ്യവസ്ഥയുടെ ​ഗതി എന്താകും?

ഡല്‍ഹി: രാജ്യത്തെ കൊവിഡ് കേസുകൾ കുത്തനെ ഉയരുന്ന സാഹചര്യത്തിൽ വീണ്ടും ലോക്ക് ഡൗൺ പ്രഖ്യാപിക്കുമോ എന്ന ആശങ്കയിലാണ് ജനങ്ങൾ. സ്ഥിതിഗതികൾ അങ്ങേയറ്റം രൂക്ഷമായാൽ മാത്രമേ ലോക്ക് ഡൗൺ പ്രഖ്യാപിക്കുകയുള്ളൂ എന്ന് പ്രധാനമന്ത്രി നരേന്ദ്രമോദി വ്യക്തമാക്കിയിട്ടുണ്ട്. എന്നാൽ കഴിഞ്ഞ വർഷത്തെപോലെ ഇത്തവണയും ലോക്ക് ഡൗൺ പ്രഖ്യാപിച്ചാൽ രാജ്യത്തെ സമ്പദ്‍വ്യവസ്ഥ താറുമാറാകുമെന്നാണ് പഠനങ്ങൾ പറയുന്നത്. ജിഡിപി വളര്‍ച്ചാ നിരക്കില്‍ രണ്ട് ശതമാനം വരെ ഇടിവ് രേഖപ്പെടുത്തിയേക്കാമെന്നും അമേരിക്കന്‍ ബ്രോക്കറേജ് സ്ഥാപനമായ ബോഫ സെക്യൂരിറ്റീസ് മുന്നറിയിപ്പ് നൽകി.

രാജ്യത്ത് 24 മണിക്കൂറിനുള്ളിൽ മൂന്നര ലക്ഷം പുതിയ കൊവിഡ് കേസുകളാണ് റിപ്പോർട്ട് ചെയ്യുന്നത്. 2,263 പേരാണ് ഇന്നലെ മാത്രം മരിച്ചത്. കഴിഞ്ഞ മാസത്തെ അപേക്ഷിച്ച് പുതിയ കേസുകളിൽ ഏഴ് മടങ്ങ് വർധനയാണ് ഉണ്ടായിരിക്കുന്നത്. ലോക് ഡൗണ്‍ പ്രഖ്യാപിക്കാതെ നിലവിലെ നിയന്ത്രണങ്ങൾ തുടരുകയാണെങ്കിൽ 2021-22 സാമ്പത്തിക വർഷത്തിൽ മൊത്ത മൂല്യവർദ്ധിത വളർച്ചയിൽ 9 ശതമാനം വളർച്ചയാണ് കാണുന്നതെന്ന് ബ്രോക്കറേജ് പറഞ്ഞു.

Also Read: കൊവിഡ് ചികിത്സയ്ക്ക് പണം ആവശ്യമുണ്ടോ? മികച്ച വായ്പ ഓപ്ഷനുകളിതാ

ലോക് ഡൗണ്‍ പ്രഖ്യാപിച്ചാല്‍ മൊത്ത ആഭ്യന്തര ഉത്പാദന വളർച്ചയിൽ ഒരു മാസംകൊണ്ട് ഒന്ന് മുതല്‍ രണ്ട് ശതമാനം വരെ ഇടിവാണ് കണക്കാക്കുന്നത്. കേന്ദ്ര-സംസ്ഥാന സര്‍ക്കാരുകള്‍ക്ക് ഉയര്‍ന്ന സാമ്പത്തിക ബാധ്യതയാകും ലോക്ക് ഡൗൺ കൊണ്ടുവരിക. ഇതോടെ സര്‍ക്കാറിന്റെ ധനകമ്മി ഉയരാനുള്ള സാധ്യതയും കൂടുതലാണ്. അതിനാൽ രാത്രികാല കർഫ്യൂ, പ്രാദേശിക ലോക്ക് ഡൗൺ തുടങ്ങിയ നിയന്ത്രണങ്ങൾ ഏർപ്പെടുത്തി കൊവിഡിന്റെ വ്യാപനം തടയേണ്ടത് അത്യാവശ്യമാണെന്നും കമ്പനി അറിയിച്ചു.