ആ വഴി പോകല്ലേ... ടോൾ കൂടും: ഗൂഗിൾ മാപ്പ്; പുതിയ ഫീച്ചർ അ‌തിഗംഭീരം

ഒരു റൂട്ടിലൂടെ സഞ്ചരിക്കുമ്പോൾ അയാൾക്ക് ടോൾ ആയി എത്ര രൂപ നൽകേണ്ടി വരും എന്ന് കൂടി ഇനി ഗൂഗിൾ മാപ്പ് പറയും. ആൻഡ്രോയിഡ്, ഐഒഎസ് ആപ്പുകളിലും ഈ ഫീച്ചർ ലഭ്യമാകുമെന്ന് ഗൂഗിൾ അറിയിച്ചു. ആപ്പിൽ പുതിയ ടോൾ നിരക്ക് ലഭ്യമാകുന്നതായി ജിഎസ്എം അരീന റിപ്പോർട്ട് ചെയ്തിട്ടുണ്ട്. സാങ്കേതിക പ്രശ്നങ്ങളാൽ ചില ഉപയോക്താക്കൾക്ക് പുതിയ ഫീച്ചർ ലഭ്യമാകുന്നില്ല എന്ന് ആൻഡ്രോയിഡ് പോലീസ് റിപ്പോർട്ട് ചെയ്തു. ഗൂഗിൾ ഉടൻ തന്നെ എല്ലാവരിലേക്കും പുതിയ ഫീച്ചർ അവതരിപ്പിക്കും എന്ന് പ്രതീക്ഷിക്കാം.

ഏപ്രിലിലാണ് ഗൂഗിൾ ആദ്യമായി ടോൾ ഫീച്ചർ പ്രഖ്യാപിച്ചത്. പ്രാദേശിക ടോളിംഗ് അതോറിറ്റികളിൽ നിന്നുള്ള വിശ്വസനീയമായ വിവരങ്ങൾ അനുസരിച്ചാണ് ടോൾ വിവരങ്ങൾ കൊടുത്തിട്ടുള്ളത് എന്ന് ഗൂഗിൾ അറിയിച്ചു. റൂട്ടുകൾ കാണിക്കുന്ന സമായത്ത് അവോയ്ഡ് ടോൾസ് എന്നുള്ള ടോഗിളും കൂട്ടിച്ചേർത്തിട്ടുണ്ട്. ഈ വിവരമനുസരിച്ച് നമ്മുടെ യാത്രക്ക് ടോളുകൾ ഒഴിവാക്കിയുള്ള ആൾട്ടർനേറ്റീവ് വഴികൾ തെരഞ്ഞെടുക്കാവുന്നതാണ്.

നേരത്തെ കാണിച്ചിരുന്ന റൂട്ടുകളിൽ ടോൾ ഉണ്ടെന്ന് ഗൂഗിൾ മാപ്പ് നമ്മളെ അറിയിച്ചിരുന്നെങ്കിലും കൃത്യമായി എത്ര രൂപ അടക്കണമെന്ന വിവരം ഇപ്പോഴാണ് നമുക്ക് അറിയാനാകുന്നത്. ഏറ്റവും പുതിയ അപ്‌ഡേറ്റിനൊപ്പമാണ് ഈ മാറ്റം വന്നിട്ടുള്ളത്. ഗൂഗിൾ പറയുന്നതനുസരിച്ച്, യുണൈറ്റഡ് സ്റ്റേറ്റ്സ്, ഇന്ത്യ, ജപ്പാൻ, ഇന്തോനേഷ്യ എന്നിവിടങ്ങളിലെ ഏകദേശം 2000 ടോൾ റോഡുകളിൽ ഈ ഫീച്ചർ iOS, Android ആപ്പുകളിൽ ലഭ്യമാണ്. കൂടുതൽ രാജ്യങ്ങളിലേക്ക് ഈ സംവിധാനം ഉടൻ വ്യാപിപ്പിക്കുമെന്ന് ഗൂഗിൾ അറിയിച്ചു.