സമ്പദ് വ്യവസ്ഥയ്ക്ക് അടുത്ത രണ്ട് മാസങ്ങള്‍ നിര്‍ണായകം; എസ്.ബി.ഐ ചെയര്‍മാന്‍

അടുത്ത രണ്ട് മാസങ്ങള്‍ രാജ്യത്തെ സമ്പദ് വ്യവസ്ഥയേ സംബന്ധിച്ചിടത്തോളം അങ്ങേയറ്റം നിര്‍ണായകമാണെന്ന് എസ്.ബി.ഐ ചെയര്‍മാന്‍ രജനീഷ് കുമാര്‍. സാമ്പത്തിക വളര്‍ച്ചയില്‍ ആറ് വര്‍ഷക്കാലത്തെ ഏറ്റവും കുറഞ്ഞ നിരക്കിലേക്ക് എത്തിയിരിക്കുന്നതാണ് ഇതിന് കാരണം. കൂടുതല്‍ പൊതു മേഖലാ ബാങ്കുകള്‍ ലയിപ്പിക്കാനുള്ള സര്‍ക്കാര്‍ തീരുമാനത്തെ അദ്ദേഹം പിന്തുണച്ചു. ലയനത്തിനു വിധേയമാകുന്ന ബാങ്കുകളെ സംബന്ധിച്ചിടത്തോളം നിലവിലുള്ള ഉപഭോക്താക്കളെ നിലനിര്‍ത്തുക എന്നത് പ്രധാനമാണെന്നും അദ്ദേഹം പറഞ്ഞു.

സമ്പദ് വ്യവസ്ഥയില്‍ ഉടലെടുത്തിരിക്കുന്ന പ്രതിസന്ധി എത്രത്തോളം ചാക്രികമാണ്, എത്രത്തോളം ഘടനാപരമാണ് എന്നത് സംബന്ധിച്ച കൃത്യമായ രൂപമില്ലെന്നും അടുത്ത രണ്ട് മാസങ്ങള്‍ ആകും ഇത് സംബന്ധിച്ച സൂചന നല്‍കുക എന്നും അദ്ദേഹം ചൂണ്ടിക്കാട്ടി.

വാഹന വിപണി, എഫ്.എം.സി.ജി തുടങ്ങിയ മേഖലകള്‍ പ്രതിസന്ധി നേരിടുകയാണെന്നും അദ്ദേഹം വ്യക്തമാക്കി. നാഷണല്‍ സ്റ്റാറ്റിസ്റ്റിക് ഓഫീസ് ഏപ്രില്‍ ജൂണ്‍ പാദത്തിലെ ജി.ഡി.പിവളര്‍ച്ചാ നിരക്ക് ആറ് വര്‍ഷത്തെ താഴ്ന്ന നിരക്കായ അഞ്ച് ശതമാനത്തില്‍ എത്തി എന്ന റിപ്പോര്‍ട്ട് കഴിഞ്ഞ ആഴ്ച്ച പുറത്ത് വിട്ടിരുന്നു.