ചൈനയ്ക്ക് പുറത്ത് നിക്ഷേപം തേടുന്നവർക്കായി പദ്ധതികൾ തയ്യാറാക്കുമെന്ന് നിർമ്മലാ സീതാരാമൻ

വാഷിങ്ടൺ: ചൈനയ്ക്ക് പുറത്ത് നിക്ഷേപസാധ്യതകൾ തേടുന്ന അന്താരാഷ്ട്ര കമ്പനികളെ ആകർഷിക്കാനായി പദ്ധതികൾ ആവിഷ്കരിക്കുമെന്ന് കേന്ദ്ര മന്ത്രി നിർമ്മലാ സീതാരാമൻ. ചൈനയ്ക്ക് പുറത്ത് ബിസിനിസ് വ്യാപിപ്പിയ്ക്കാൻ താൽപ്പര്യപ്പെടുന്നവർക്ക് ഇന്ത്യയെ തെരഞ്ഞെടുക്കാനുതകുന്ന നടപടികളെടുക്കുമെന്നും മന്ത്രി വാഷിങ്ടണിൽ പറഞ്ഞു.

ലോകത്തെ വിവിധ വ്യവസായ പ്രമുഖരുമായും കമ്പനികളുമായും സര്‍ക്കാര്‍ ചര്‍ച്ച നടത്തി അവരെ ഇന്ത്യയിലേക്ക് ക്ഷണിക്കേണ്ടത് പ്രധാനപ്പെട്ട കാര്യമാണെന്നും നിർമ്മലാ സീതാരാമൻ പറഞ്ഞു. ഇന്ത്യയിലേക്ക് മടങ്ങിയാൽ തീർച്ചയായും ഞാൻ വ്യവസായികളെ ആകർഷിക്കാനുള്ള പദ്ധതികൾ തയ്യാറാക്കും, അവർ പറഞ്ഞു.

'അമേരിക്കയിൽ നിന്നും യൂറോപ്യൻ രാജ്യങ്ങളിൽ നിന്നുമുള്ള വ്യവസായങ്ങൾക്ക് ഇന്ത്യ എന്തുകൊണ്ടാണ് അനുയോജ്യമായ സ്ഥലമെന്നത് വിശദമാക്കുന്ന ബ്ലൂപ്രിന്‍റ് തയ്യാറാക്കിയാകും വ്യവസായികളെ സമീപിക്കുക.' അന്താരാഷ്ട്ര നാണയനിധിയും ലോകബാങ്കുമായും നടത്തിയ വാർഷിക കൂടിക്കാഴ്ചയ്ക്ക് ശേഷം ഇന്ത്യൻ മാധ്യമങ്ങളോട് സംസാരിക്കുകയായിരുന്നു കേന്ദ്ര ധനകാര്യ മന്ത്രി.

നിലവില്‍ ചൈനയും യുഎസും തമ്മിലുള്ള വിഷയങ്ങളെ അടിസ്ഥാനമാക്കിയല്ല സര്‍ക്കാര്‍ ഈ തീരുമാനത്തിലെത്തിയതെന്നും മന്ത്രി വ്യക്തമാക്കി. രാജ്യങ്ങൾ തമ്മിലുള്ള വിഷയങ്ങൾ ഏതെങ്കിലും തരത്തിൽ സ്വാധീനം ചെലുത്തിയേക്കാമെന്നും എന്നാൽ മറ്റു പല കാരണങ്ങൾകൊണ്ടും സ്ഥലം മാറാൻ ഉദ്ദേശിക്കുന്ന കമ്പനികളുണ്ടെന്നും അവർക്ക് അനുയോജ്യമായ ഇടമാണ് ഇന്ത്യയെന്നും മന്ത്രി പറഞ്ഞു.