​റിപ്പോ,റിവേഴ്‌സ് റിപ്പോ നിരക്കുകളില്‍ മാറ്റമില്ല; വായ്പാ നയം പ്രഖ്യാപിച്ച് ആര്‍ബിഐ

ഡല്‍ഹി: ആര്‍ബിഐ വായ്പാ നയം പ്രഖ്യാപിച്ചു. റിപ്പോ നിരക്ക് മാറ്റമില്ലാതെ തുടരുമെന്നാണ് പ്രഖ്യാപനം. 4% ആണ് നിലവിലെ റിപ്പോ നിരക്ക്. ആതേ സമയം റിവേഴ്‌സ് റിപ്പോ നിരക്കിനും മാറ്റമില്ലാതെ 3.35%ത്തില്‍ തന്നെ തുടരും. കോവിഡ് രൂക്ഷമായ സാഹചര്യത്തില്‍ ഇത് 10ാം തവണയാണ് ആര്‍ബിഐ വായ്പാ നിരക്കുകള്‍ മാറ്റമില്ലാതെ നിലനിര്‍ത്തുന്നത്. സാമ്പത്തിക വളര്‍ച്ചയെ പിന്തുണക്കുന്നതിനായാണ് നിലവിലെ നിരക്കുകള്‍ തന്നെ തുടരുന്നതെന്ന് ആര്‍ബിഐ ഗവര്‍ണര്‍ ശക്തികാന്ത ദാസ് പറഞ്ഞു.

കേന്ദ്രബാങ്ക് മറ്റ് ബാങ്കുകള്‍ക്ക് പണം കടം കൊടുക്കുന്ന നിരക്കാണ് റിപ്പോ നിരക്ക്. മറ്റുള്ളവരില്‍ നിന്ന് കേന്ദ്രബാങ്ക് കടമെടുക്കുന്നതിന് നിശ്ചയിക്കുന്ന നിരക്കാണ് റിവേഴ്‌സ് റിപ്പോ നിരക്ക്. 2020 മെയ് മുതല്‍ ആര്‍ബിഐ റിപ്പോ നിരക്ക് റെക്കോര്‍ഡ് താഴ്ച്ചയില്‍ തന്നെയാണ്. ഈ സാഹചര്യത്തില്‍ രാജ്യത്തെ സമ്പദ് വ്യവസ്ഥ വീണ്ടെടുക്കുന്നതു വരെ നിരക്കുകളിൽ മാറ്റമില്ലാതെ തുടരാനാണ് തീരുമാനമെന്ന് ഗവര്‍ണര്‍ നേരത്തെ അറിയിച്ചിരുന്നു. ഇതുതന്നെയാണ് ഈ നയപ്രഖ്യാപന വേളയിലും അദ്ദേഹം ആവര്‍ത്തിച്ചത്. സര്‍ക്കാര്‍ പണപ്പെരുപ്പം 2%- 6% പരിധിയില്‍ നിലനിര്‍ത്തണമെന്നും ആര്‍ബിഐ നിര്‍ദേശിച്ചു.