കുതിച്ചുയര്‍ന്ന് ഉള്ളി വില; കിലോയ്ക്ക് 80 രൂപ കടന്നു

ഡൽഹി: പത്ത് മാസത്തെ ഇടവേളയ്ക്ക് ശേഷം ഉള്ളി വില വീണ്ടും കുതിച്ചുയരുന്നു. ദിനംപ്രതി അഞ്ച് രൂപ വീതമാണ് വര്‍ധിക്കുന്നത്. ഉള്ളി കൃഷി ചെയ്യുന്ന സംസ്ഥാനങ്ങളിലുണ്ടായ കനത്ത മഴയും കീടബാധയുമാണ് കൃഷി നശിക്കാനും വില കൂടാനും കാരണമായത്. ഈ മാസം ആദ്യം ഉള്ളി വില കിലോയ്ക്ക് 35 രൂപയായിരുന്നു‍. എന്നാൽ ഒരു കിലോ ഉള്ളിയുടെ വില ഇതിനകം 80 രൂപ കടന്നതായാണ് റിപ്പോർട്ട്. അടുത്ത മൂന്ന് മാസത്തേക്ക് ഉള്ളി വില ഇനിയും വര്‍ധിക്കുമെന്നും മൊത്തക്കച്ചവടക്കാര്‍ പറയുന്നു.

തെലങ്കാന, കർണാടക, മഹാരാഷ്ട്രയിലെ നാസിക്കില്‍ നിന്നാണ് പ്രധാനമായും ഉള്ളിയെത്തുന്നത്. ഇവിടങ്ങളിലെ വിളയുടെ 90 ശതമാനവും കനത്ത മഴയിൽ നശിച്ചു. പുതിയ കൃഷിയിറക്കിയാലും വിളവെടുത്ത് മാർക്കറ്റിലെത്താൻ അടുത്ത വർഷം മാര്‍ച്ച് മാസമെങ്കിലുമാകും. നിലവില്‍ ലഭിക്കുന്ന ഉള്ളിയുടെ ഗുണനിലവാരം കുറവാണ്. കഴിഞ്ഞവര്‍ഷ അവസാനം ഉള്ളി വില 200 രൂപയോളം അടുത്തിരുന്നു.

Als0 Read: നിങ്ങളുടെ നാട്ടിൽ ആരംഭിക്കാനാകുന്ന ആറ് ബിസിനസ് ആശയങ്ങൾ

പ്രതിദിനം 1,000 ടൺ ഉള്ളി ഉപയോഗിക്കുന്ന ചെന്നൈ ഇപ്പോൾ വിതരണ പ്രതിസന്ധി നേരിട്ടു കൊണ്ടിരിക്കുകയാണ്. നിലവിലെ ആവശ്യത്തിനായി ചെന്നൈയിൽ 5,000 ട്രക്ക് ലോഡ് സവാള ആവശ്യമാണെങ്കിലും 15 മുതൽ 20 വരെ ട്രക്കുകൾ മാത്രമാണ് എത്തിച്ചേരുന്നത്. ഉള്ളി കർഷകരാണ് ഏറ്റവും കൂടുതൽ ദുരിതത്തിലായിരിക്കുന്നത്. ഇവരുടെ അവസ്ഥയെക്കുറിച്ച് ബന്ധപ്പെട്ട സർക്കാരുകൾ ശ്രദ്ധിക്കുന്നില്ലെന്ന് വ്യാപാരികൾ പറയുന്നു. ഫെബ്രുവരി മുതൽ ഓഗസ്റ്റ് വരെ ഉള്ളി വില കുറവായിരുന്നു.

ഇന്ത്യയിൽ നിന്ന് ഉള്ളി കയറ്റുമതി ചെയ്യുന്നതിന് കേന്ദ്രം നിരോധനം ഏർപ്പെടുത്തിയ ശേഷം രാജ്യാന്തര വിപണിയിൽ ഉള്ളി വില ഉയർന്നിരുന്നു. ഈ സാഹചര്യത്തിൽ ഉത്‌പന്നങ്ങൾ‌ ഇറക്കുമതി ചെയ്യാനും നിലവിലെ കുറവ് പരിഹരിക്കാനും സർക്കാർ തീരുമാനിക്കുകയാണെങ്കിൽ‌ ഇതിന് സമയമെടുക്കും. അപ്പോഴേക്കും ഇവിടെ ഉള്ളി വില 100 കടക്കുമെന്നും വ്യാപാരികൾ‌ കൂട്ടിച്ചേർത്തു.