മൊബൈൽ ആപ്പ് വഴിയുള്ള ഓൺലൈൻ മദ്യ വിൽപന ഉടൻ; ആപ്ലിക്കേഷന്റെ നിർമാണം അവസാനഘട്ടത്തിൽ

തിരുവനന്തപുരം: സംസ്ഥാനത്ത് ഓൺലൈൻ മദ്യ വില്‍പനയ്ക്കുള്ള മൊബൈൽ‍ ആപ്ലിക്കേഷന്‍ നിർമ്മാണം അവസാനഘട്ടത്തിൽ. കൊച്ചി കടവന്ത്രയിലെ സ്റ്റാര്‍ട്ട് അപ് കമ്പനിയായ ഫെയര്‍ കോഡ് ടെക്‌നോളജീസ് വികസിപ്പിച്ച ആപ്ലിക്കേഷൻ ഗൂഗിള്‍ ആപ്പ് സ്റ്റോറിന്റെ അനുമതി ലഭിച്ചാലുടൻ പരീക്ഷണാടിസ്ഥാനത്തില്‍ പ്രവര്‍ത്തനമാരംഭിക്കും.

സ്മാർട് ഫോണും സാധാരണ ഫോണും ഉപയോഗിക്കുന്നവർക്ക് പ്രയോജനപ്പെടുത്താവുന്ന രണ്ട് തരം സംവിധാനമാണ് ഓണ്‍ലൈന്‍ മദ്യ വിതരണത്തിന് ഒരുങ്ങുന്നത്. 21 വയസ്സിന് മുകളില്‍ പ്രായമുള്ളവര്‍ക്ക് മാത്രമാണ് ഓണ്‍ലൈന്‍ വഴി മദ്യം ബുക്ക് ചെയ്യാനാകുക. സംസ്ഥാനത്തെ 301 ബിവറേജസ് ഔട്ട്‌ലെറ്റുകൾ, 511 ബാറുകൾ, 222 ബിയർ വൈൻ പാർലറുകൾ എന്നിവയുടെ വിശദാംശങ്ങളാണ് ആപ്ലിക്കേഷനിൽ ഉൾക്കൊള്ളിച്ചിരിക്കുന്നത്.

ആപ്പ് വഴി എങ്ങനെ മദ്യം ഓർഡർ ചെയ്യാം

1. സ്മാര്‍ട്ട് ഫോണ്‍ ഉപയോഗിക്കുന്നവര്‍ പ്ലേ സ്റ്റോര്‍ വഴി ആപ് ഡൗണ്‍ലോഡ് ചെയ്യുക.
2. ആപ്പിലേക്ക് പ്രവേശിച്ചാല്‍ ആദ്യം ജില്ല തെരഞ്ഞെടുക്കുക.
3. മദ്യം ബുക്ക് ചെയ്യുന്ന ആള്‍ക്ക് ഏത് സ്ഥലത്താണോ മദ്യം എത്തേണ്ടത് ആ സ്ഥലത്തെ പിന്‍കോഡ് നല്‍കി കടകള്‍ തെരഞ്ഞെടുക്കു.നല്‍കുന്ന പിന്‍കോഡിന്റെ പരിധിയില്‍ ബാർ ഔട് ലെറ്റുകള്‍ ഇല്ലെങ്കില്‍ മറ്റൊരു പിന്‍കോഡ് നല്‍കി വീണ്ടും ബുക്ക് ചെയ്യേണ്ടതാണ്.
4. മദ്യം വാങ്ങാന്‍ താല്‍പ്പര്യമുള്ള സമയം തെരഞ്ഞെടുക്കുക. ഇതുവഴി ആ സമയത്ത് മദ്യം ലഭ്യമാകുന്ന ഔട് ലെറ്റുകള്‍, ബാറുകള്‍ എന്നിവയുടെ വിശദാംശങ്ങൾ ലഭ്യമാകും.
5. ഓരോ ഔട് ലെറ്റുകള്‍ക്കും രാവിലെ മുതല്‍ ടൈം സ്ലോട്ടുകള്‍ ഉണ്ടാകും. ഇതില്‍ ഒരു ഔട് ലെറ്റ് തെരഞ്ഞെടുത്താല്‍ ക്യൂ ആര്‍ കോഡ് അല്ലെങ്കില്‍ ടോക്കണ്‍ നമ്പര്‍ ലഭിക്കും. അനുവദിച്ച സമയത്ത് ഔട് ലെറ്റില്‍ എത്താനായില്ലെങ്കില്‍ വീണ്ടും ബുക്ക് ചെയ്യേണ്ടിവരും.

സമാര്‍ട് ഫോണ്‍ ഇല്ലാത്തവര്‍ക്കായി പ്രത്യേകം ഒരു മൊബൈല്‍ നമ്പര്‍ നല്‍കും. ഈ നമ്പറിലേക്ക് പിന്‍കോഡ് അടക്കമുള്ള വിശദാംശങ്ങള്‍ എസ്എംഎസ് അയക്കണം. ഇതോടെ മദ്യം ലഭിക്കാനുള്ള ടോക്കണ്‍ നമ്പര്‍ എസ്എംഎസ് ആയി ലഭിക്കും. തലേദിവസം ബുക്ക് ചെയ്താല്‍ പിറ്റേ ദിവസം മദ്യം ലഭിക്കുന്ന രീതിയിലാണ് ആപ്പ് ക്രമീകരിച്ചിരിക്കുന്നത്.

അതേസമയം ലോക്ക് ഡൗണിനിടെ അടച്ചിട്ട സംസ്ഥാനത്തെ മദ്യഷാപ്പുകൾ വ്യാഴാഴ്ച മുതൽ തുറക്കും. ബീവറേജ്, കൺസ്യൂമർഫെഡ് ഔട് ലെറ്റുകള്‍, ബാറുകൾ, ബിയർ വൈൻ പാർലറുകൾ എന്നിവ വഴിയാണ് മദ്യം ലഭിക്കുക. രാവിലെ ഒമ്പതുമണി മുതൽ വൈകീട്ട് അ‍ഞ്ചുമണിവരെയാണ് ഔട് ലെറ്റുകൾ തുറക്കുക. ബീവറേജ് ഔട് ലെറ്റുകൾ രാത്രി ഒമ്പതുമണിവരെ തുറന്നുപ്രവർത്തിക്കും.