50 കോടി രൂപയുടെ ക്യാഷ്ബാക്ക് ഓഫറുമായി പേടിഎം

കൊച്ചി: ഡിജിറ്റൽ പേയ്‌മെന്റ് പ്ലാറ്റ്ഫോമായ പേടിഎം ഉപഭോക്താക്കൾക്കും വ്യാപാരികൾക്കുമായി പ്രത്യേക ക്യാഷ്ബാക്ക് പ്രോഗ്രാം അവതരിപ്പിച്ചു. ഇതിനായി 50 കോടി രൂപയാണ് കമ്പനി മാറ്റിവച്ചിരിക്കുന്നത്. ഡിജിറ്റൽ ഇന്ത്യയുടെ ആറ് വർഷം ആഘോഷിക്കുന്നതിന്റെ ഭാഗമായാണ് കമ്പനി ഇത്തരത്തിലൊരു ഓഫർ പ്രഖ്യാപിച്ചത്. പേടിഎം ആപ്ലിക്കേഷൻ വഴി നടത്തുന്ന ഇടപാടുകൾക്കാണ് ക്യാഷ്ബാക്ക് ലഭിക്കുക.

പേടിഎം ക്യുആർ കോഡ് സ്കാനിങ്ങിലൂടെയുള്ള ഇടപാടിനും ഈ ക്യാഷ്ബാക്ക് ഓഫർ ലഭിക്കും. പേടിഎമ്മിന്റെ ഈ ഓഫർ രാജ്യത്തൊട്ടാകെയുള്ള 200 ജില്ലകളിലാണ് ആദ്യഘട്ടത്തിൽ‌ ആവിഷ്കരിക്കുക. കർണാടക, കേരളം, തമിഴ്‌നാട്, ആന്ധ്രാപ്രദേശ്, തെലങ്കാന തുടങ്ങിയ സംസ്ഥാനങ്ങളിൽ ഇതിൽ ഉൾപ്പെടും. പേടിഎമ്മിൽ രജിസ്റ്റർ ചെയ്ത വ്യാപാരികൾക്കും ആകർഷകമായ സമ്മാനങ്ങൾ നേടാനുള്ള സുവർണ്ണാവസരവും കമ്പനി ഒരുക്കിയിട്ടുണ്ട്. ദീപാവലിക്ക് മുൻപ് ആപ്പ് വഴി ഏറ്റവും കൂടുതൽ കച്ചവടം നടത്തുന്ന വ്യാപാരികൾക്കാണ് ക്യാഷ്ബാക്കും സമ്മാനങ്ങളും ലഭിക്കുക.

Also Read: പാകം ചെയ്യാത്ത ഫ്രഷ് ചിക്കൻ ഇപ്പോൾ സ്വിഗ്ഗിയിലും കിട്ടും

ഓൺലൈൻ പണമിടപാട് പ്രോത്സാഹിപ്പിക്കുന്നതിനാണിത്. രാജ്യത്തിന്റെ വളരുന്ന സമ്പദ്‌വ്യവസ്ഥയിലേക്ക് സംഭാവന നൽകാൻ ഡിജിറ്റൽ ഇന്ത്യ ദൗത്യം ബാധ്യസ്ഥമാണ്. നമ്മുടെ രാജ്യത്ത് ഡിജിറ്റൽ പേയ്‌മെന്റുകൾ പുനർ‌നിർവചിച്ചുകൊണ്ട് ഡിജിറ്റൽ പരിവർത്തനത്തിന്റെ പ്രേരകനാകാൻ കഴിഞ്ഞതിൽ സന്തോഷമുണ്ടെന്നും പേടിഎം സിഇഒയും സ്ഥാപകനുമായ വിജയ് ശേഖർ ശർമ പറഞ്ഞു.