ഇന്ധനവില കത്തിക്കയറി സർവ്വകാല റെക്കോഡിൽ; പെട്രോളിന് 80.73, ഡീസലിന് 73.65 രൂപ

തിരുവനന്തപുരം: സംസ്ഥാനത്ത് ഇന്ധനവില കത്തിക്കയറുന്നു. ഇന്ന് പെട്രോളിന് 34 പൈസയും ഡീസലിന് 27 പൈസയുമാണ് വര്‍ധനവുണ്ടായത്. തുടര്‍ച്ചയായ ഒൻപതാം ദിവസമാണ് ഇന്ധനവിലയിൽ മൻ വര്‍ധനവുണ്ടാകുന്നത്. തലസ്ഥാനത്ത് പെട്രോളിന് 80.73 രൂപയും ഡീസലിന് 73.65 രൂപയിലുമാണ് ഇന്ന് വ്യാപാരം പുരോഗമിക്കുന്നത്. കൊച്ചിയില്‍ പെട്രോളിന് 79.29 രൂപയും ഡീസലിന് 72.22 രൂപയും കണ്ണൂരില്‍ പെട്രോളിന് 79. 65 രൂപയും ഡീസലിന് 72.65 രൂപയുമാണ് വില.

രാജ്യമൊട്ടാകെ ഇന്ധനവില കുതിച്ചുയരുന്ന സാഹചര്യത്തില്‍ കേന്ദ്ര പെട്രോളിയം മന്ത്രാലയം തീരുവ കുറയ്ക്കുന്ന കാര്യം പരിഗണിക്കുന്നുണ്ടെന്നാണു അറിയാൻ കഴിയുന്നത്. തുടര്‍ച്ചയായ ഇന്ധന വിലവര്‍ധന രാജ്യത്തിന്‍റ് ഇറക്കുമതി ചെലവ് ഉയര്‍ത്തുന്നതിനോടൊപ്പം കറന്‍റ് അക്കൗണ്ട് കമ്മിയും വര്‍ധിപ്പിക്കും. അസംസ്കൃത എണ്ണയുടെ ഇറക്കുമതിക്കു കൂടുതല്‍ ഡോളര്‍ വേണ്ടി വരുന്നതു മൂലം രൂപയുടെ മൂല്യവും ഇടിയും. അസംസ്കൃത എണ്ണവില രാജ്യാന്തര വിപണിയില്‍ സമീപഭാവിയില്‍ തന്നെ ബാരലിന് 90 ഡോളറായേക്കുമെന്നാണ് വിദഗ്ധര്‍ പറഞ്ഞുവെച്ചിട്ടുള്ളത്.