ഇന്ധന വില സര്‍വ്വകാല റെക്കോര്‍ഡ് നിരക്കിൽ; പെട്രോളിന് 80; ഡീസലിന് 73

തിരുവനന്തപുരം: സംസ്ഥാനത്ത് ഇന്ധനവില സര്‍വ്വകാല റെക്കോര്‍ഡിലേക്ക് കുതിക്കുന്നു. സംസ്ഥാനത്ത് ഇന്ന് പെട്രോളിന് 80 രൂപ രണ്ട് പൈസയും, ഡീസലിന് 73 രൂപയുമാണ് വില. കർണാടക തെരഞ്ഞെടുപ്പിന് ശേഷം ഇന്ധന വിലയിൽ ഗണ്യമായ വർധനവാണ് ദിനംപ്രതി ഉണ്ടാകുന്നത്. രാജ്യാന്തര വിപണിയിൽ അസംസ്‌കൃത എണ്ണക്കും വില ഉയരുകയാണ്.

തലസ്ഥാന നഗരിയിൽ ലിറ്ററിന് 80.02 രൂപയിലെത്തിയാണ് നഗരത്തിൽ ഇന്ന് പെട്രോൾ വ്യാപാരം പുരോഗമിക്കുന്നത്. മെട്രോ നഗരമായ കൊച്ചിയിൽ ലിറ്ററിന് 78.623 രൂപയും കോഴിക്കോട് ലിറ്ററിന് 78.966 രൂപ എന്നീ നിരക്കിലുമാണ് ഇന്നത്തെ പെട്രോൾ വ്യാപാരം പുരോഗമിക്കുന്നത്.

തലസ്ഥാനത്ത് ഡീസലിന് 73.065 ആയപ്പോൾ കോഴിക്കോട് ലിറ്ററിന് 72.015 രൂപയും കൊച്ചിയിൽ 71.681 രൂപ എന്നീ നിരക്കിൽ വ്യാപാരം പുരോഗമിക്കുന്നു. ഡീസല്‍ വില ക്രമാതീതമായി വര്‍ധിച്ചതോടെ പെട്രോള്‍ വിലയും ഡീസല്‍ വിലയും തമ്മിൽ വലിയ വില വ്യത്യാസമില്ല എന്നതാണ് വസ്തുത.