ഇന്ധന വില കുത്തിക്കയറുന്നു; പെട്രോളിന് 81.31

തിരുവനന്തപുരം: സംസ്ഥാനത്ത് വീണ്ടും ഇന്ധനവിലയിൽ തുടര്‍ച്ചയായ പതിനൊന്നാം ദിവസവും വര്‍ധനവ് രേഖപ്പെടുത്തി. തലസ്ഥാനത്ത് പെട്രോളിന് 81 രൂപ കടന്നു. പെട്രോളിന് ഇന്നലെ 31 പൈസയും ഇന്ന് 30 പൈസയുമാണ് വര്‍ധിച്ചത്. കഴിഞ്ഞദിവസവും ഇന്നുമായി ഡീസലിന് 27 പൈസ വീതവും വര്‍ധനവുണ്ടായി.

തിരുവനന്തപുരത്ത് പെട്രോളിന് 81.31 രൂപയും ഡീസലിന് 74.16 രൂപയുമാണ് ഇന്നത്തെ വ്യാപാരവില. ചരിത്രത്തില്‍ ആദ്യമായാണ് പെട്രോളിന് 81 രൂപ കടക്കുന്നത്. കൊച്ചിയില്‍ പെട്രോളിന് 79.90 രൂപയും ഡീസലിന് 72.76 രൂപയും കണ്ണൂരില്‍ പെട്രോളിന് 78.42 രൂപയും ഡീസലിന് 69.50 രൂപയുമാണ് വില. കോഴിക്കോട് പെട്രോളിന് 80.24 രൂപയും ഡീസലിന് 73.09 രൂപയുമാണ് ഇന്നത്തെ വില.

കര്‍ണ്ണാടക തെരഞ്ഞെടുപ്പിനെ തുടര്‍ന്ന് തുടര്‍ച്ചയായ 19 ദിവസത്തോളം ഇന്ധനവില മാറ്റമില്ലാതെ തുടര്‍ന്നിരുന്നു. അക്കാലയളവിൽ നേരിട്ട നഷ്ടം ഒന്നിച്ച് തിരിച്ചു പിടിക്കാനാണ് ദിനംപ്രതി കണക്കില്ലാതെ ഇന്ധനവില വര്‍ധിപ്പിക്കുന്നതെന്നാണ് പരക്കെ ഉയരുന്ന ആക്ഷേപം.

രാജ്യമൊട്ടാകെ ഇന്ധനവില കുതിച്ചുയരുന്ന സാഹചര്യത്തില്‍ കേന്ദ്ര പെട്രോളിയം മന്ത്രാലയം തീരുവ കുറയ്ക്കുന്ന കാര്യം പരിഗണിക്കുന്നുണ്ടെന്നാണു അറിയാൻ കഴിയുന്നത്. തുടര്‍ച്ചയായ ഇന്ധന വിലവര്‍ധന രാജ്യത്തിന്‍റെ ഇറക്കുമതി ചെലവ് ഉയര്‍ത്തുന്നതിനോടൊപ്പം കറന്‍റ് അക്കൗണ്ട് കമ്മിയും വര്‍ധിപ്പിക്കും. അസംസ്കൃത എണ്ണയുടെ ഇറക്കുമതിക്കു കൂടുതല്‍ ഡോളര്‍ വേണ്ടി വരുന്നതു മൂലം രൂപയുടെ മൂല്യവും ഇടിയും. അസംസ്കൃത എണ്ണവില രാജ്യാന്തര വിപണിയില്‍ സമീപഭാവിയില്‍ തന്നെ ബാരലിന് 90 ഡോളറായേക്കുമെന്നാണ് വിദഗ്ധര്‍ പറഞ്ഞുവെച്ചിട്ടുള്ളത്.

അതേസമയം വില പിടിച്ചുനിര്‍ത്താന്‍ ശ്രമം നടക്കുന്നുണ്ടെന്ന് കേന്ദ്ര സര്‍ക്കാര്‍ പറയുന്നുണ്ടെങ്കിലും അതേപ്പറ്റി തങ്ങള്‍ക്ക് യാതൊരുവിധ നിര്‍ദേശങ്ങളും ഇതുവരെ ലഭിച്ചിട്ടില്ലെന്നാണ് ഇന്ത്യന്‍ ഓയില്‍ അധികൃതര്‍ വ്യക്തമാക്കുന്നത്. കര്‍ണാടക തെരഞ്ഞെടുപ്പും ഇന്ധന വില വര്‍ധനയും തമ്മില്‍ ബന്ധമൊന്നുമില്ലെന്നും അധികൃതര്‍ ചൂണ്ടിക്കാട്ടി. ഇന്ധനവിലയിലെ അധിക നികുതി ഒഴുവാക്കുന്നതിനെ സംബന്ധിച്ച തീരുമാനം എടുക്കാൻ മന്ത്രിസഭ കൂടുകയാണിപ്പോൾ.