സംസ്ഥാനത്ത് പെട്രോൾ-ഡീസൽ വില മാറ്റമില്ലാതെ തുടരുന്നു

തിരുവനന്തപുരം: സംസ്ഥാനത്ത് പെട്രോൾ-ഡീസൽ വില മാറ്റമില്ലാതെ തുടരുന്നു. കഴിഞ്ഞ അഞ്ച് ദിവസത്തോളമായി ഇന്ധന വില ഇടിയുകയായിരുന്നു. തലസ്ഥാനത്ത് പെട്രോൾ ലിറ്ററിന് 76.86 രൂപയിലും ഡീസൽ ലിറ്ററിന് 68.94 രൂപയിലുമാണ് വ്യാപാരം പുരോഗമിക്കുന്നത്.അതേസമയം കൊച്ചിയിൽ പെട്രോൾ വില ലിറ്ററിന് 75.52 രൂപയിലും ഡീസൽ വില ലിറ്ററിന് 67.63 രൂപയിലുമാണ് വ്യാപാരം പുരോഗമിക്കുന്നത്.

കേന്ദ്ര ബജറ്റിൽ പെട്രോളിനും ഡീസലിനും എക്സൈസ് നികുതിയിളവ് പ്രഖ്യാപിച്ചതോടെ രണ്ട് രൂപ കുറഞ്ഞിരുന്നുവെങ്കിലും റോഡ്, ഇൻഫ്രാസ്ട്രക്ചര്‍ സെസ് ലിറ്ററിന് എട്ട് രൂപ വീതം കൂട്ടുകയും ചെയ്തിരുന്നു. ഇതിനാൽ തന്നെ വിലയിൽ മാറ്റമില്ലാത്ത അവസ്ഥയായിരുന്നു. എന്നാൽ കഴിഞ്ഞ അഞ്ച് ദിവസങ്ങളിലായാണ് പെട്രോൾ-ഡീസൽ വിലയിൽ നേരിയ ഇടിവ് രേഖപ്പെടുത്തിത്തുടങ്ങിയത്.

അന്താരാഷ്ട്രവിപണിയിൽ ക്രൂഡ് ഓയിൽ വില വര്‍ദ്ധിച്ചതോടെ നികുതി കുറച്ച് ഇന്ധനവില പിടിച്ചുനിര്‍ത്തണമെന്ന് ദീര്‍ഘനാളായുള്ള ആവശ്യമായിരുന്നു. പെട്രോളിയം ഉത്പന്നങ്ങളുടെ വില ദ്വൈവാരമായി നിര്‍ണ്ണയിക്കുന്ന രീതി പുന:സ്ഥാപിക്കാനാണ് സര്‍ക്കാര്‍ ആലോചിക്കുന്നത്. വരാനിരിക്കുന്ന തെരഞ്ഞെടുപ്പുകള്‍ കൂടി ലക്ഷ്യമിട്ടാണ് കേന്ദ്രത്തിന്‍റെ ഈ നീക്കമെന്നാണ് റിപ്പോര്‍ട്ട്.

ജൂണ്‍ 16-നാണ് ഇന്ധനവില ദിവസവും മാറുന്ന രീതി സര്‍ക്കാര്‍ നടപ്പിൽ വരുത്തിയത്. അന്ന് പെട്രോൾ ലിറ്ററിന് 68.53 രൂപയും ഡീസൽ ലിറ്ററിന് 58.70 രൂപയുമായിരുന്നു. അന്താരാഷ്‌ട്ര വിപണിയില്‍ ക്രൂഡ് ഓയിലിന്‍റെ വിലയിൽ വ്യതിയാനമുണ്ടാകുന്നതിനാലാണ് പെട്രോളിന്‍റെയും ഡീസലിന്‍റെയും വിലയില്‍ ഓരോ ദിവസവും ഏറ്റക്കുറച്ചില്‍ ഉണ്ടാകുന്നതും മാറ്റമില്ലാതെ തുടരുന്നതും.