ഇന്ത്യയിൽ പെട്രോൾ വില കുറയുമോ?വൻ തോതിൽ വില കുറച്ച് പാക്കിസ്ഥാൻ

കൊച്ചി: ലോകമെമ്പാടും ക്രൂഡ് ഓയിൽ വിലയിൽ ഉണ്ടായ ഇടിവായിരുന്നു കൊറോണക്കാലത്തെ പ്രധാന തലക്കെട്ടുകളിൽ ഒന്ന്. അമേരിക്കയിൽ അസംസ്കൃത എണ്ണ വില 0 ഡോളറിലും താഴെയായി വ്യാപാരം നടത്തിയത് ചരിത്രമായിരുന്നു. എന്നാൽ ക്രൂഡ് ഓയിൽ വിലയിൽ ഉണ്ടായ ഇടിവിന് ആനുപാതികമായി രാജ്യത്ത് എണ്ണ കമ്പനികൾ പെട്രോൺ, ഡീസൽ വില കുറയ്ക്കാൻ തയ്യാറായില്ല.

പക്ഷേ വിപ്ലവകരമായ നടപടിയുമായി എത്തിയിരിക്കുകയാണ് പാക്കിസ്ഥാൻ സർക്കാർ. പെട്രോളിന് ലിറ്ററിന് 15 രൂപയും ഡീസലിന് 25 രൂപയുമാണ് കുറച്ചത്. പെട്രോൾ, ഡീസൽ, മണ്ണെണ്ണ എന്നിവയുടെ എല്ലാം വില സർക്കാർ കുറച്ചു എന്നാണ് റിപ്പോർട്ടുകൾ. പെട്രോളിയം ഉത്പന്നങ്ങൾക്ക് 15 മുതൽ 38 ശതമാനം വരെയാണ് വില കുറച്ചിരിയ്ക്കുന്നത്.

Also Read: ലോക്ക്ഡൗൺ; ഊബർ, ഒല ടാക്സി സേവനങ്ങൾ ലഭ്യമാകുന്ന നഗരങ്ങൾ

ക്രൂഡ് ഓയിൽ വില കുറഞ്ഞതിൻറെ നേട്ടം ഉപഭോക്താക്കൾക്ക് കൈമാറുന്ന നടപടിയാണ് സർക്കാർ സ്വീകരിച്ചിരിയ്ക്കുന്നത്. അതേസമയം വിലക്കിഴിവിന് ആനുപാതികമായി നികുതി നിരക്കുകൾ വർധിപ്പിച്ചിട്ടുണ്ട്. പക്ഷേ അത് ഉപഭോക്താക്കൾക്ക് അധികഭാരമാകില്ല. ഇന്ത്യയിലേതിനേക്കാൾ താരതമ്യേന കൂടുതലാണ് ഇപ്പോൾ പാക്കിസ്ഥാനിൽ പെട്രോൾ, ഡീസൽ വില.

ഇന്ത്യയിൽ ക്രൂഡ് വിലയിൽ ഉണ്ടായ കുറവിന് ആനുപാതികമായി പെട്രോൾ, ഡീസൽ വില കുറഞ്ഞിട്ടില്ല.
ലോക്ക്ഡൗൺ പ്രഖ്യാപിച്ചത് മൂലം ഡീസൽ, പെട്രോൾ ഡിമാൻഡ് കുത്തനെ ഇടിഞ്ഞിട്ടും വിലയിൽ കുറവ് ഉണ്ടായില്ല. കുറച്ചു ദിവസങ്ങളായി വിലയിൽ മാറ്റമില്ലാതെ ഒരേ നിരക്കിലാണ് വില.