ബാങ്കിങ് രംഗത്ത് വിപ്ലവം സൃഷ്ടിച്ച് തപാൽ ബാങ്ക് ആരംഭിക്കുന്നു

കൊച്ചി: ബാങ്കിങ് മേഖലയിൽ വിപ്ലവം സൃഷിടിക്കാനൊരുങ്ങി പോസ്റ്റൽ വിഭാഗം. ഏറ്റവും വലിയ ബാങ്കിങ് ശ്രംഖല ലക്ഷ്യമിട്ടാണ് ഇന്ത്യ പോസ്റ്റ് പേയ്‌മെന്റ്‌സ് ബാങ്ക്(ഐപിപിബി) ഇന്ന് പ്രവർത്തനം ആരംഭിക്കുന്നത്. കേരളത്തിൽ 14 ശാഖകൾ ഉള്ള ബാങ്കിന് രാജ്യത്തൊട്ടാകെ 650 ശാഖകളുണ്ടാകും. ഡിസംബർ 31 ന് മുൻപായി 1,55,000 തപാൽ ഓഫീസുകളിൽ പ്രവർത്തനം വ്യാപിപ്പിക്കും.

രാജ്യത്തിന് ഇതിലൂടെ വലിയ സാമ്പത്തിക വളർച്ചയുണ്ടാകും. നിലവിൽ 140000 ബാങ്ക് ശാഖകളാണ് ഇന്ത്യയിൽ ഉള്ളത്. ഇത് 295000 ആയി ഉയർത്തും. എല്ലാ ഗ്രാമങ്ങളിലേക്കും ബാങ്കിങ് സേവനം എത്തിക്കുക എന്നതാണ് മറ്റൊരു പ്രധാന ലക്ഷ്യം. അത്യാധുനിക സേവനങ്ങൾ എല്ലാം വാഗ്‌ദാനം ചെയ്തുകൊണ്ടാണ് ബാങ്ക് പ്രവർത്തനം ആരംഭിക്കുന്നത്.

മൊബൈൽ ആപ്പ് തുടങ്ങിയ ഡിജിറ്റൽ സേവനവും താമസിയാതെ ലഭ്യമാക്കും. ഉപഭോക്താക്കൾക്ക് ക്യു ആർ കാർഡ് സംവിധാനവും ലഭ്യമാക്കും. ക്വിക് റെസ്പോൺസ് കാർഡിലൂടെ വേഗത്തിൽ ഷോപ്പിങ് നടത്താനും മറ്റുമുള്ള സൗകര്യം ഉണ്ടാകും. അതിന് അകൗണ്ട് നമ്പറോ പാസ്‌വേഡോ ഒന്നും ഓർമയിൽ സൂക്ഷിക്കേണ്ട ആവശ്യമില്ല.

ബാങ്ക് സേവനങ്ങൾ വാതിൽപ്പടിയിൽ എത്തിക്കാനുള്ള ശ്രമവും തുടങ്ങിക്കഴിഞ്ഞു. മൂന്ന് ലക്ഷത്തോളം തപാൽ ജീവനക്കാരെ ഇതിനായി നിയോഗിക്കും. തിരുവനന്തപുരം, കൊല്ലം, റാന്നി, ആലപ്പുഴ, കട്ടപ്പന, കോട്ടയം, ഇടപ്പള്ളി, തൃശൂർ, പാലക്കാട്, പെരിന്തൽമണ്ണ, കോഴിക്കോട്, മാനന്തവാടി, കണ്ണൂർ, ഉപ്പള എന്നിവയാണ് കേരളത്തിലെ ശാഖകൾ. തപാൽ വകുപ്പിന്റെ 74 ഓഫീസുകൾ ബാങ്കിന്റെ ആക്‌സിസ് പോയിന്റുകളായി പ്രവർത്തിക്കും.