വിക്ടോറിയാസ് സീക്രട്ട്സ് മുഖം മിനുക്കുന്നു, മാലാഖയാകാൻ പ്രിയങ്ക ചോപ്രയും

മുംബൈ: ലോകോത്തര ബ്രാൻഡായ വിക്ടോറിയാസ് സീക്രട്ട്സ് മുഖം മിനുക്കുന്നു. സ്ത്രീ ശാക്തീകരണം ലക്ഷ്യമിട്ടുള്ള ബ്രാൻഡിന്റെ പ്രവർത്തനങ്ങളുടെ മുഖമുദ്രയായി ബോളിവുഡ് താരം പ്രിയങ്ക ചോപ്ര ഉൾപ്പടെ ഏഴ് പേരെ കമ്പനി ബ്രാൻഡ് അംബാസിഡർമാരായി നിയമിച്ചു. ഫുട്ബോൾ താരം മേഗൻ റാപ്പിനോ, മാധ്യമപ്രവർത്തക അമേന്ത ഡി കാഡെനെറ്റ്, എയ്ലീൻ ഗു, പലോമ എൽസേസർ, വാലന്റീന സാംപായോ തുടങ്ങിയവരാണ് പ്രിയങ്കയ്ക്കൊപ്പമുള്ള മറ്റ് സൂപ്പർ മോഡലുകൾ. പൊതുവേ ഇത്തരം മോഡലുകളെ കമ്പനി മാലാഖ എന്നാണ് വിളിക്കാറുള്ളത്.

സ്ത്രീകൾക്ക് കൂടുതൽ പ്രധാന്യം കൊടുത്തുള്ള പ്രവർത്തനങ്ങൾക്കാണ് കമ്പനി ലക്ഷ്യമിടുന്നത്. അതിന്റെ ഭാഗമായി തന്നെയാണ് വിവിധ മേഖലകളിൽ തിളങ്ങി നിൽക്കുന്ന ഈ താരങ്ങളെ ബ്രാൻഡിന്റെ ഭാഗമാക്കിയത്. പ്രിയങ്ക അടക്കമുള്ള പുതിയ അംഗങ്ങളെ പരിചയപ്പെടുത്തിക്കൊണ്ട് കമ്പനി ഇൻസ്റ്റ്ഗ്രാം പേജിൽ പോസ്റ്റ് പങ്കുവച്ചിരുന്നു. വിക്ടോറിയാസ് സീക്രട്ട്സിന്റെ ഭാവിക്കായി പുതിയ പങ്കാളിത്തത്തിൽ ഏർപ്പെട്ടെന്നും ഇവർ ബ്രാൻഡിന്റെ പ്രവർത്തനങ്ങളിൽ സഹായിക്കുമെന്നും കമ്പനി കുറിച്ചു.

Also Read: കിലോയ്ക്ക് രണ്ടര ലക്ഷം രൂപ വിലയുള്ള മാങ്ങ, മാവിന് കാവലായി 6 പട്ടികളും 4 ഗാർഡുകളും


ലോകത്തെ പലകാര്യങ്ങളിലും വളരെ മന്ദഗതിയിലാണ് പ്രതികരിച്ചിരുന്നത്. ഇനി പുരുഷന്മാർക്ക് എന്താണ് വേണ്ടത് എന്നതിനെക്കുറിച്ചും സ്ത്രീകൾ എന്താണ് ആഗ്രഹിക്കുന്നത് എന്നതിനെക്കുറിച്ചും അറിഞ്ഞിരിക്കേണ്ടത് അത്യാവശ്യമാണെന്ന് വിക്ടോറിയാസ് സീക്രട്ട്സിന്റെ ചീഫ് എക്സിക്യൂട്ടീവ് മാർട്ടിൻ വാട്ടേഴ്‌സ് ന്യൂയോർക്ക് ടൈംസിന് നൽകിയ അഭിമുഖത്തിൽ പറഞ്ഞു. പ്രിയങ്ക ചോപ്രയും മറ്റ് ആറ് പേരും ചേർന്ന് വിക്ടോറിയാസിന്റെ ഉത്പന്നങ്ങൾ പ്രചരിപ്പിക്കുന്നതിനും മാതൃയാക്കുന്നതിനും കൈക്കോർക്കും.

ഫാഷൻ ഷോകൾ ഉൾപ്പടെ സംഘടിപ്പിക്കുന്ന ബ്രാൻഡിനെതിരെ നേരത്തെ നിരവധി വിമർശനങ്ങൾ ഉയർന്നിരുന്നു. സൂപ്പർ സെക്സി മോഡലുകളെ ഉൾപ്പെടുത്തിയുള്ള കമ്പനിയുടെ ഫാഷൻ ഷോയ്ക്കെതിരെയാണ് വിമർശനമുണ്ടായത്. കെൻഡാൽ ജെന്നർ, ജിജി ഹഡിഡ്, ലില്ലി ആൽഡ്രിഡ്ജ്, അലസ്സാന്ദ്ര അംബ്രോസിയോ തുടങ്ങിയ സൂപ്പർ മോഡലുകളായിരുന്നു കമ്പനിയെ പ്രതിനിധീകരിച്ച് ഫാഷൻ ഷോകളിൽ പങ്കെടുത്തിരുന്നത്.