പുതിയ മാനദണ്ഡങ്ങള്
നിലവില് ഡിജിറ്റല് പ്ലാറ്റ്ഫോമുകളിലൂടെയുള്ള വായ്പകള് അനുവദിക്കുന്നതും തിരിച്ചടക്കുന്നതിലും പൂള് അക്കൗണ്ടുകള് ചില സ്ഥാപനങ്ങള് ഉപയോഗിക്കുന്നുണ്ട്. ഇത് ഉപഭോക്താവിന് പിന്നീട് പ്രതിസന്ധിയിലാക്കുമെന്ന കണക്കുകൂട്ടലിലാണ് ആര്ബിഐ. അതുകൊണ്ട് തന്നെ ഇനി മുതല് വായ്പയെടുക്കുന്നതും തിരിച്ചടക്കുന്നതും ഉപഭോക്താവിന്റെ ബാങ്ക് അക്കൗണ്ടും വായ്പാ സ്ഥാപനവുമായി (ബാങ്ക്,എന്ബിഎഫ്സി പോലുള്ളവ)നേരിട്ടും മാത്രമേ പാടുളളൂ.പൂള് അക്കൗണ്ടുകളൊന്നും ഉണ്ടാകാന് പാടില്ല. കൂടാതെ വായ്പയുമായി ബന്ധപ്പെട്ട ഫീസോ മറ്റു ചാര്ജുകളോ വായ്പ നല്കുന്ന സ്ഥാപനമാണ് അടക്കേണ്ടത്. വായ്പ എടുക്കുന്നയാളല്ലെന്നും ആര്ബിഐ പറയുന്നു. ഡിജിറ്റല് വായ്പകളില്
മൂന്നാം കക്ഷികളുടെ അനിയന്ത്രിതമായ ഇടപെടല്, തെറ്റായ വില്പന, ഡാറ്റാ സ്വകാര്യതയുടെ ലംഘനം, അന്യായമായ ബിസിനസ്സ് പെരുമാറ്റം, അമിതമായ പലിശ നിരക്ക് ഈടാക്കല്, അനീതിപരമായ വീണ്ടെടുക്കല് രീതികള് എന്നിവയൊക്കെ നിയന്ത്രിക്കപ്പെടേണ്ടതാണെന്ന് ആര്ബിഐ നിരീക്ഷിച്ചു.
നിബന്ധനകള് ആര്ക്കൊക്കെ ?
നിലവില് മൂന്ന് തരത്തിലുള്ള സ്ഥാപനങ്ങളാണ് ഡിജിറ്റല് വായ്പകള് അനുവദിക്കുന്നത്. റിസര്വ് ബാങ്ക് നിയന്ത്രിക്കുന്നതും വായ്പാ ബിസിനസിന് അനുമതിയുള്ളതുമായ സ്ഥാപനങ്ങളാണ് ഒന്ന്. രണ്ടാമതായി ആര്ബിഐ നിയന്ത്രണത്തിലുള്ളതല്ലെങ്കിലും മറ്റ് നിയമങ്ങള്ക്ക് കീഴില് വായ്പ നല്കാന് അനുമതിയുള്ള സ്ഥാപനങ്ങളാണ്. മൂന്നാമതായി നിയമപരമായ വ്യവസ്ഥകള്ക്ക് വിധേയമല്ലാതെ പ്രവര്ത്തിക്കുന്ന സ്ഥാപനങ്ങളാണ്.ഇതില് ആര്ബിഐ നിയന്ത്രണത്തിലുള്ളതും മറ്റ് നിയമങ്ങള്ക്ക് കീഴിലുള്ളതുമായ സ്ഥാപനങ്ങളെ ഉദ്ദേശിച്ചാണ് മാനദണ്ഡങ്ങള് പുറത്തിറക്കിയത്.
പരാതി പരിഹാരം 30 ദിവസത്തിനകം
ക്രെഡിറ്റ് ലിമിറ്റ് വായ്പക്കാരന്റെ സമ്മതം നോക്കാതെ ഉയര്ത്താന് പാടില്ല. വായ്പാ കരാര് ഉറപ്പാക്കും മുമ്പ് തന്നെ സ്റ്റാന്റേര്ഡ് കീ ഫാക്ട് സ്റ്റേറ്റ്മന്റ് ഉപഭോക്താവിന് നല്കണം.ഡിജിറ്റല് വായ്പയുമായി ബന്ധപ്പെട്ട് ഒരു വര്ഷത്തിനകം ഉണ്ടാകുന്ന മുഴുവന് ചെലവുകളുടെയും വാര്ഷിക ശതമാന നിരക്ക് കെഎഫ്എസില് കാണിച്ചിരിക്കണം.ഇതൊക്കെയാണ് പ്രധാന നിര്ദേശങ്ങള്. ആര്ബിഐയുടെ നിര്ദേശങ്ങളില് ഉപഭോക്താക്കള്ക്ക് മുന്ഗണന നല്കണമെന്നാണ് ചുരുക്കം. നിമിഷങ്ങള്ക്കകം ഉള്ള വായ്പയായതിനാല് എന്ത് നിബന്ധനകളും ഉപഭോക്താക്കളെ കൊണ്ട് പരോക്ഷമായി അംഗീകരിപ്പിക്കുന്ന നടപടി ഇനി മുതല് നടക്കില്ലെന്നാണ് മനസിലാകുന്നത്.
പരാതി പരിഹരിക്കാന് നോഡല് ഓഫീസര്
ഡിജിറ്റല് വായ്പയുമായി ബന്ധപ്പെട്ട പരാതികള് കേള്ക്കാനും പരിഹരിക്കാനുമായി നോഡല് ഓഫീസറെ റഗുലേറ്ററി സ്ഥാപനം ഉറപ്പുവരുത്തേണ്ടതുണ്ട്. ഇത് സംബന്ധിച്ച വിശദാംശങ്ങള് വെബ്സൈറ്റിലും നല്കിയിരിക്കണമെന്ന് ആര്ബിഐ നിര്ദേശിക്കുന്നു. ഒരാള് പരാതി നല്കിയാല് മുപ്പത് ദിവസത്തിനകം തന്നെ പരിഹരിച്ചിരിക്കണം. ആവശ്യമുള്ള വിവരങ്ങള് മാത്രമേ പരാതിക്കാരനില് നിന്ന് ചോദിക്കാന് പാടുളളൂ. ഉപഭോക്താവിന്റെ ഡാറ്റകള് സംരക്ഷിക്കാന് സ്ഥാപനത്തിന് ബാധ്യതയുണ്ടെന്നും ആര്ബിഐ പറഞ്ഞു.ഉപഭോക്താവിന്റെ മുന്കൂര് അനുമതി വാങ്ങാതെ വായ്പ നല്കുന്ന മൊബൈല് ആപ്ലിക്കേഷനുകള് അവരുടെ വിവരങ്ങള് ശേഖരിക്കാന് പാടില്ലെന്നും നേരത്തെ നല്കിയ അനുമതികളും ഡാറ്റകളും പിന്വലിക്കാന് ഉപഭോക്താവിന് അവകാശമുണ്ടെന്നും മാനദണ്ഡങ്ങള് പറയുന്നു .
നിര്ദേശങ്ങള് സമര്പ്പിച്ചത് ആറംഗ കമ്മറ്റി
ഡിജിറ്റല് ,മൊബൈല് ആപ്ലിക്കേഷന് വഴിയുള്ള വായ്പാ സംരംഭങ്ങള്ക്ക് എതിരെ നിരന്തരമായി പരാതി ഉയര്ന്ന സാഹചര്യത്തില് ആര്ബിഐ വര്ക്കിങ് കമ്മിറ്റി രൂപീകരിച്ചിരുന്നു.2021 ജനൂവരി 13നായിരുന്നു വര്ക്കിങ് ഗ്രൂപ്പ് ഓണ് ഡിജിറ്റല് ലെന്റിങ് എന്ന പേരില് ഗ്രൂപ്പ് രൂപീകരിച്ചത്.ഈ സമിതിയാണ് ഡിജിറ്റല് വായ്പാ പ്ലാറ്റ്ഫോമുകളെയും ഉപഭോക്താക്കള് നേരിടുന്ന അതിക്രമങ്ങളെ കുറിച്ചും പഠിച്ച് ആര്ബിഐക്ക് റിപ്പോര്ട്ട് സമര്പ്പിച്ചത്. ഈ റിപ്പോര്ട്ടിന്റെ അടിസ്ഥാനത്തിലാണ് ആര്ബിഐ പുതിയ മാനദണ്ഡങ്ങള് പുറത്തിറക്കിയത്.പുതിയ നടപടികളിലൂടെ ഡിജിറ്റല് വായ്പാ സ്ഥാപനങ്ങളെ ഒരു ചട്ടക്കൂടിലേക്ക് കൊണ്ടുവരാനാണ് ആര്ബിഐ ലക്ഷ്യമിടുന്നത്. ആര്ബിഐ നിയന്ത്രിക്കുന്ന സ്ഥാപനങ്ങള്ക്കോ ഏതെങ്കിലും നിയമപ്രകാരമുള്ള വായ്പകള് നല്കാന് അനുമതിയുള്ള സ്ഥാപനങ്ങള്ക്കോ മാത്രം ഡിജിറ്റല് വായ്പ അനുവദിക്കാന് സാധിക്കുന്നവിധത്തിലാണ് പുതിയ മാനദണ്ഡങ്ങള് .