ഇനി വിമാനത്തിലും ഇന്റർനെറ്റ്, ഒപ്പം വൈഫൈ കോളിം​ഗും; 499 രൂപയുടെ ഇൻ-ഫ്ലൈറ്റ് പ്ലാനുമായി ജിയോ

ഡൽഹി: വിമാനത്തിനുള്ളിൽ ഇന്റർനെറ്റ് കണക്ടിവിറ്റി ലഭിക്കുന്നതിനുള്ള മൂന്ന് റീചാർജ് പ്ലാനുകൾ പ്രഖ്യാപിച്ച് റിലയൻസ് ജിയോ. 499, 699, 999 രൂപ വിലയുള്ള മൂന്ന് ഇൻ-ഫ്ലൈറ്റ് കണക്റ്റിവിറ്റി പായ്ക്കുകൾ ആണ് കമ്പനി വ്യാഴാഴ്ച അവതരിപ്പിച്ചത്. ഇതുസംബന്ധിച്ച് 22 അന്താരാഷ്ട്ര വിമാനക്കമ്പനികളുമായി റിലയന്‍സ് ജിയോ കരാറിലെത്തി. മൂന്ന് പ്ലാനുകൾക്കും ഒരുദിവസത്തെ വാലിഡിറ്റിയാണ് ജിയോ വാഗ്ദാനം ചെയ്യുന്നത്.

ഡാറ്റയോടൊപ്പം എസ്എംഎസ് സേവനങ്ങളും ലഭ്യമാകും. തിരഞ്ഞെടുത്ത എയർലൈൻസിൽ വോയിസ് സേവനങ്ങളും ലഭ്യമാണ്. മൂന്ന് പ്ലാനുകളിലും ഇൻകമിംഗ് കോളുകൾ അനുവദനീയമല്ല. പ്രീപെയ്ഡ്, പോസ്റ്റ് പെയ്ഡ് ഉപഭോക്താക്കൾക്ക് ഇൻ-ഫ്ലൈറ്റ് കണക്റ്റിവിറ്റി പ്ലാനുകൾ ലഭ്യമാകും. വൈ-ഫൈ കോളിംഗിനായും ജിയോ പ്ലാനുകൾ അവതരിപ്പിച്ചിട്ടുണ്ട്. ദീർഘദൂര വിമാനയാത്ര നടത്തുന്ന ഉപയോക്താക്കൾ‌ക്കാണ് ഈ പ്ലാനുകൾ‌ ഉപയോഗപ്രദമാകുക.

ജിയോ ഇൻ-ഫ്ലൈറ്റ് കണക്റ്റിവിറ്റി പ്ലാനുകൾ

499 പ്ലാൻ: 250 എംബി മൊബൈൽ ഡാറ്റ,100 എസ്എംഎസ്, 100 മിനിറ്റ് ഔട്ട്‌ഗോയിംഗ് കോളുകൾ
699 രൂപ പ്ലാൻ: 500 എംബി മൊബൈൽ ഡാറ്റ, 100 എസ്എംഎസ്, 100 മിനിറ്റ് ഔട്ട്‌ഗോയിംഗ് കോളുകൾ
999 രൂപ പ്ലാൻ: 1 ജിബി മൊബൈൽ ഡാറ്റ,100 എസ്എംഎസ്, 100 മിനിറ്റ് ഔട്ട്‌ഗോയിംഗ് കോളുകൾ

എയർ ലിംഗസ്, എയർ സെർബിയ, അലിറ്റാലിയ, ഏഷ്യാന എയർലൈൻസ്, ബിമാൻ ബംഗ്ലാദേശ് എയർലൈൻസ്, കാതേ പസഫിക്, ഈജിപ്ത് എയർ, എമിറേറ്റ്സ്, ഇത്തിഹാദ് എയർവേയ്‌സ്, യൂറോ വിംഗ്സ്, ഇവി‌എ എയർ, കുവൈറ്റ് എയർവേയ്‌സ്, ലുഫ്താൻസ, മലേഷ്യ എയർലൈൻസ്, മാലിൻഡോ എയർ, എസ്‌എ‌എസ് സ്കാൻഡിനേവിയൻ എയർലൈൻസ്, സിംഗപ്പൂർ എയർലൈൻസ്, സ്വിസ്, ടിഎപി എയർ പോർച്ചുഗൽ, ടർക്കിഷ് എയർലൈൻസ്, ഉസ്ബെക്കിസ്ഥാൻ എയർവേസ്, വിർജിൻ അറ്റ്ലാന്റിക് തുടങ്ങിവ 22 എയർലൈനുമായാണ് ജിയോ ധാരണയിലെത്തിയത്.

വൈഫൈ കോളിംഗ് ഉൾപ്പെടുത്തിയുള്ള രണ്ട് വാല്യു പായ്ക്കും ജിയോ പുറത്തിറക്കിയിട്ടുണ്ട്. ഇന്ത്യയിലേക്ക് തിരികെ വിളിക്കാൻ മാത്രമേ വൈഫൈ കോളിംഗ് സൗകര്യം അനുവദിക്കുകയുള്ളൂ. ലോകത്തെവിടെ നിന്നും വൈ-ഫൈയിൽ‌ ഇൻ‌കമിംഗ് കോളുകൾ‌ സ്വീകരിക്കാവുന്നതാണ്. വൈഫൈ വഴിയുള്ള ഔട്ട്‌ഗോയിംഗ് എസ്എംഎസ് അനുവദനീയമല്ല.

1102 രൂപയുടെ ജിയോ പായ്ക്ക്: വൈഫൈ കോളിംഗിനൊപ്പം പരിധിയില്ലാത്ത ഇൻകമിംഗ്, ഔട്ട്‌ഗോയിംഗ് വോയ്‌സ് കോളുകൾ വാഗ്ദാനം ചെയ്യുന്നു. ഇന്ത്യയിലെ ജിയോ നമ്പറുകളിലേക്ക് വോയ്‌സ്- വീഡിയോ കോളുകൾ, ഡാറ്റ, എസ്എംഎസ് ആനുകൂല്യങ്ങൾ എന്നിവയും 1102 രൂപയുടെ ജിയോ പായ്ക്കിൽ ഉൾപ്പെടുന്നു. 28 ദിവസത്തെ സാധുതയുള്ള പായ്ക്ക് നൂറിലധികം രാജ്യങ്ങൾക്ക് ബാധകമാണ്.

1202 രൂപയുടെ ജിയോ പായ്ക്ക്: വൈഫൈ കോളിംഗിനൊപ്പം പരിധിയില്ലാത്ത ഇൻകമിംഗ്, ഔട്ട്‌ഗോയിംഗ് വോയ്‌സ് കോളുകൾ വാഗ്ദാനം ചെയ്യുന്നു. ഇന്ത്യയിലെ ജിയോ നമ്പറുകളിലേക്ക് വോയ്‌സ്- വീഡിയോ കോളുകൾ, ഡാറ്റ, എസ്എംഎസ് ആനുകൂല്യങ്ങൾ എന്നിവയും 1202 രൂപയുടെ ജിയോ പായ്ക്കിൽ ഉൾപ്പെടുന്നു. 28 ദിവസത്തെ സാധുതയുള്ള പായ്ക്ക് 170 രാജ്യങ്ങളിൽ ബാധകമാണ്.

ഔട്ട്‌ഗോയിംഗ് ലോക്കൽ കോളുകൾക്ക് മിനിറ്റിന് 2 രൂപയും ഔട്ട്‌ഗോയിംഗ് ഇന്റർനാഷണൽ കോളുകൾക്ക് മിനിറ്റിന് 100 രൂപയുമാണ് നിരക്ക്. ഇന്ത്യയിലേക്കുള്ള വൈഫൈ വോയ്‌സ് കോളിംഗിന് മിനിറ്റിന് 1 രൂപയാണ് ഈടാക്കുക. വൈഫൈ വഴിയുള്ള വീഡിയോ കോളുകൾ ഒരു ജിയോ നമ്പറിലേക്ക് മാത്രമേ ചെയ്യാൻ കഴിയുകയുള്ളൂ.