ഉപഭോക്താക്കളെ പിടിച്ചു നിര്‍ത്താന്‍ പുതിയ ഓഫറുകളുമായി ജിയോ

മറ്റ് നെറ്റ് വര്‍ക്കിലേക്കുള്ള കോളുകള്‍ക്ക് നിരക്ക് ഈടാക്കും എന്ന അറിയിപ്പിന് തൊട്ടു പിറകെ നിലവിലുള്ള ഉപഭോക്താക്കളെ പിടിച്ചു നിര്‍ത്താന്‍ പുതിയ ഓഫറുകളുമായി ജിയോ. നിലവിലുള്ള ഉപഭോക്താക്കള്‍ക്ക് 30 മിനിറ്റ് സൗജന്യ ടോക്ക് ടൈം ആണ് കമ്പനി ഓഫര്‍ ചെയ്തത്.

പുതിയ നിരക്ക് ഏര്‍പ്പെടുത്തല്‍ മൂലം ഉപഭോക്താക്കള്‍ മറ്റു നെറ്റ്വര്‍ക്കുകളിലേക്ക് പോര്‍ട്ട് ചെയ്തേക്കാം എന്ന ആശങ്കകളെ തുടര്‍ന്നാണ് പുതിയ ഓഫറുമായി കമ്പനി രംഗത്തു വന്നിരിക്കുന്നത് എന്നാണ് സൂചന. പുതിയ പ്രഖ്യാപനം നടത്തി 48 മണിക്കൂറിന് ഉള്ളിലാണ് ഉപഭോക്താക്കള്‍ക്ക് ഇത് സംബന്ധിച്ച അറിയിപ്പ് ലഭിച്ചത്.

ഫോണ്‍ റീചാര്‍ജ് ചെയ്തതിന് ശേഷമുള്ള ആദ്യ 30 മിനിറ്റുകളില്‍ ആണ് ഫ്രീ ടോക് ടൈം ലഭിക്കുന്നത്. ഒറ്റത്തവണ മാത്രമേ ഓഫര്‍ ലഭിക്കൂ. സൗജന്യ സേവനം അവസാനിപ്പിച്ചതിനു തൊട്ടു പുറകെ സമൂഹമാധ്യമങ്ങളില്‍ ഉള്‍പ്പെടെ ശക്തമായ പ്രതിഷേധവുമായി ഉപഭോക്താക്കള്‍ രംഗത്ത് എത്തിയിരുന്നു.