സിനിമയിലെ ദിവസ കൂലിക്കാർക്ക് ധനസഹായവുമായി സൽമാൻ ഖാൻ, റേഷൻ കിറ്റുമായി യഷ് രാജ് ഫിലിംസും

ജൂനിയർ ആർട്ടിസ്റ്റ്, മേക്കപ്പ് ആർട്ടിസ്റ്റ്, സ്റ്റണ്ട്മാൻ, സ്പോട്ട് ബോയ്സ്, ടെക്നീഷ്യൻമാർ എന്നിവരുൾപ്പെടെ മൊത്തം രണ്ടര ലക്ഷം തൊഴിലാളികളാണ് എഫ്ഡബ്ല്യുഐസിയിൽ ഉള്ളത്. അവശ്യക്കാരായിട്ടുള്ള തൊഴിലാളികളുടെ അന്തിമ പട്ടിക സൽമാൻ ഖാന് ഉടൻ അയയ്ക്കുമെന്നും തിവാരി കൂട്ടിച്ചേർത്തു. കഴിഞ്ഞദിവസം തന്റെ ഏറ്റവും പുതിയ ചിത്രത്തിലൂടെ ലഭിക്കുന്ന വരുമാനം രാജ്യത്തുടനീളമുള്ള കൊവിഡ് -19 ദുരിതാശ്വാസ പ്രവർത്തനങ്ങൾക്കായി ചെലവിടുമെന്ന് താരത്തിന്റെ പ്രൊഡക്ഷൻ കമ്പനിയായ സൽമാൻ ഖാൻ ഫിലിംസ് അറിയിച്ചിരുന്നു. 'രാധെ: യുവർ മോസ്റ്റ് വാണ്ടഡ് ഭായ്' ആണ് താരത്തിന്റേതായി പുറത്തിറങ്ങാനിരിക്കുന്ന ചിത്രം.

പകർച്ചവ്യാധിയുടെ പശ്ചാത്തലത്തിൽ 2020ലും സൽമാൻ ഖാൻ ചലച്ചിത്ര മേഖലയിലെ തൊഴിലാളികളെ സാമ്പത്തികമായി സഹായിച്ചിരുന്നു. ദൈനംദിന വേതനക്കാരെ സഹായിക്കുന്നതിനായി പ്രൊഡ്യൂസേഴ്‌സ് ഗിൽഡ് ഓഫ് ഇന്ത്യ (പി‌ജി‌ഐ) യുടെ റിലീഫ് ഫണ്ടിലേക്ക് 7.5 കോടി രൂപയാണ് നെറ്റ്ഫ്ലിക്സ് സംഭാവന ചെയ്തത്. പിജിഐ, നെറ്റ്ഫ്ലിക്സ് എന്നിവയിൽ നിന്നായി ആകെ 3.5 കോടി രൂപയാണ് ലഭിച്ചത്. ഈ തുക സംഘടനയിലെ 7,000 കൂലി തൊഴിലാളികൾക്ക് കൈമാറുമെന്ന് തിവാരി അറിയിച്ചു. ഓരോ തൊഴിലാളികൾക്കും 5000 രൂപ വച്ചാണ് നൽകുക.

കൊവിഡിന്റെ പശ്ചാത്തലത്തിൽ സിനിമാ സെറ്റുകളിൽ ജോലി ചെയ്യുന്ന ദൈനംദിന കൂലിപ്പണിക്കാരെ സഹായിക്കുന്നതിനായി ബോളിവുഡ് പ്രൊഡക്ഷൻ ഹൗസായ യഷ് രാജ് ഫിലിംസും ധനസഹായം പ്രഖ്യാപിച്ചിട്ടുണ്ട്. ഇതിനായി 'യഷ് ചോപ്ര സാതി ഇനിഷ്യേറ്റീവ്' എന്ന പേരിൽ കമ്പനി പുതിയ ദുരിതാശ്വാസ പദ്ധതി അവതരിപ്പിച്ചു. ചലച്ചിത്രമേഖലയിലുള്ള നാലംഗ ദിവസ കൂലിക്കാരുടെ കുടുംബത്തിനും റേഷൻ കിറ്റും കമ്പനി പ്രഖ്യാപിച്ചിട്ടുണ്ട്. സ്ത്രീകൾ, മുതിർന്ന പൗരൻമാർ എന്നിവർക്ക് 5000 രൂപ ധനസഹായമായി നൽകും.