സാംസങ് ഫോണുകൾക്ക് ഇന്ത്യയിൽ പ്രിയമേറുന്നു ? വില്പനയിൽ വൻ വർധന

ഇന്ത്യൻ മൊബൈൽ വിപണിയിൽ വൻമുന്നേറ്റം നടത്തി സാംസങ് ഇന്ത്യ. കഴിഞ്ഞ സെപ്തംബർ - ഒക്ടോബർ കാലയളവിൽ 14,400 കോടി രൂപയുടെ മൊബൈൽ ഫോണുകൾ വിറ്റഴിച്ചതായി കമ്പനി അവകാശപ്പെട്ടു.പ്രീമിയം കാറ്റഗറി സ്മാർട് ഫോൺ വിഭാഗത്തിൽ 99% വളർച്ചയാണ് കമ്പനി നേടിയത്. ഈ വർഷം ജനുവരി മുതൽ സെപ്തംബർ വരെയുള്ള കാലയളവിൽ, 5G സ്മാർട് ഫോൺ സെയിൽസിൽ 178% വളർച്ചയാണ് കമ്പനി നേടിയത്. വാർഷികാടിസ്ഥാനത്തിലുള്ള വർധനയാണിത്.

ഈ വർഷത്തെ ഉത്സവ സീസണിൽ റെക്കോർഡ് വില്പനയാണ് കമ്പനി നടത്തിയത്. സെപ്തംബർ 1 മുതലുള്ള 60 ദിവസ കാലയളവിൽ 14,400 കോടിയുടെ വില്പനയാണ് നടന്നത്. കഴിഞ്ഞ വർഷവുമായി താരതമ്യം ചെയ്യുമ്പോൾ ഡബിൾ ഡിജിറ്റ് വളർച്ചയാണ് കമ്പനി നേടിയത്. ഈ വളർച്ചയ്ക്ക് പ്രധാനമായും സംഭാവന ചെയ്തത് സാംസങ് ഫിനാൻസ് പ്ലസാണ്. ഈ പ്ലാറ്റ്ഫോമിലൂടെയുള്ള വിനിമയങ്ങൾ മൂന്നു മടങ്ങായി, 10 ലക്ഷത്തിലധികമായി വർധിച്ചു.

Also Read : വാട്സാപ്പ് ബിസിനസിന് ഇന്ത്യയിൽ വൻ വളർച്ച

ടയർ II, ടയർ III നഗരങ്ങളിൽ മികച്ച വളർച്ചയാണ് കമ്പനി നേടിയത്. നഗരങ്ങളിലും വലിയ വില്പനക്കണക്കുകളാണ് സാംസങ്ങിന്റേത്. പ്രീമിയം വിഭാഗത്തിലുള്ള സ്മാർട് ഫോണുകളിൽ 30,000 രൂപയ്ക്കു മുകളിലുള്ളവയിൽ 99% വളർച്ച രേഖപ്പെടുത്തി. ഈ വർഷം ജനുവരി മുതൽ സെപ്തംബർ വരെയുള്ള കണക്കാണിത്. കഴിഞ്ഞ വർഷത്തെ ഇതേ കാലയളവുമായി താരതമ്യം ചെയ്യുമ്പോഴാണ് ഈ വളർച്ച.

കൗണ്ടർ പോയിന്റ് റിസർച്ചിന്റെ ഏറ്റവും പുതിയ റിപ്പോർട്ട് പ്രകാരം ഇന്ത്യയിലെ രണ്ടാത്തെ ഏറ്റവും വലിയ സ്മാർട് ഫോൺ സെല്ലറാണ് സാംസങ്. ജൂലൈ- സെപ്തംബർ പാദത്തിൽ 18% മാർക്കറ്റ് ഷെയർ വോളിയമാണ് കമ്പനിക്കുള്ളതെന്നും റിപ്പോർട്ട് വ്യക്തമാക്കുന്നു. സാംസങ് ഇന്ത്യയുടെ ആകെ മൊബൈൽ ഫോൺ ബിസിനസ്, 20% വളർന്നതായി കമ്പനി അവകാശപ്പെടുന്നു. 2022 ലെ ആദ്യ 9 മാസങ്ങളിൽ വരുമാന അടിസ്ഥാനത്തിൽ 22% വിപണി പങ്കാളിത്തമാണ് കമ്പനിക്കുള്ളത്.

Also Read : ഷവോമി, ഇന്ത്യയിലെ സാമ്പത്തിക സേവന ബിസിനസ് അവസാനിപ്പിച്ചു

ഇന്ത്യയിലെ ഏറ്റവും വേഗത്തിൽ വളരുന്ന പ്രീമിയം വിഭാഗമാണെന്ന് സാംസങ് ഇന്ത്യ സീനിയർ ഡയറക്ടറും, പ്രൊഡക്ട് മാർക്കറ്റിങ് ഹെഡുമായ ആദിത്യ ബാബർ പറഞ്ഞു. വാല്യു അടിസ്ഥാനത്തിൽ 2013 മുതലുള്ള കണക്കുകളിൽ തങ്ങളാണ് ഒന്നാം സ്ഥാനത്തുള്ള ബ്രാൻഡെന്നും അദ്ദേഹം പറഞ്ഞു. ഉപഭോക്താക്കൾ കൂടുതൽ പ്രീമിയം - 5G ഫോണുകൾ വാങ്ങുന്നു. ഒരു ഉപകരണത്തിന് 10,900 രൂപ വില ഈടാക്കുക വഴി 5G ജനകീയമാക്കുന്നതിൽ കമ്പനി വലിയ പങ്കാണ് വഹിക്കുന്നത്. 5G ഉപയോഗിക്കാൻ സാധിക്കുന്ന 20 ഡിവൈസുകൾ കമ്പനിക്കുണ്ട്. കഴിഞ്ഞ നാല് ക്വാർട്ടറുകളിലായി 5G വിഭാഗത്തിൽ കമ്പനിയാണ് നമ്പർ 1 ബ്രാൻഡ്. നവംബർ 15 ഓടെ എല്ലാ ഡിവൈസുകളിലും 5G സോഫ്റ്റ് വെയർ അപ്ഡേറ്റുകൾ കമ്പനി നടത്തും. ഭൂരിഭാഗം ഡിവൈസുകളും 5G സാങ്കേതിക വിദ്യയെ സപ്പോർട്ട് ചെയ്യാൻ തുടങ്ങിയെന്നും അദ്ദേഹം അറിയിച്ചു.

Read Latest Business News and Malayalam News