ഇൻഷുറൻസ് ക്ലെയിം വേ​ഗത്തിൽ തീർപ്പാക്കാൻ ഡ്രോണുകൾ ഉപയോ​ഗിച്ച് എസ്‌ബി‌ഐ

കൊൽക്കത്ത: യാസ് ചുഴലിക്കാറ്റ് ബാധിച്ച സംസ്ഥാനങ്ങളിൽ ഇൻഷുറൻസ് ക്ലെയിം വേഗത്തിൽ തീർപ്പാക്കാൻ ഡ്രോണുകൾ ഉപയോഗിക്കുമെന്ന് എസ്‌ബി‌ഐ ജനറൽ ഇൻഷുറൻസ് അറിയിച്ചു. ഒഡീഷ, പശ്ചിമ ബംഗാൾ, ജാർഖണ്ഡ് എന്നിവിടങ്ങളിൽ ചുഴലിക്കാറ്റ് മൂലമുണ്ടായ നാശനഷ്ടങ്ങൾ വിലയിരുത്താനും സർവേകൾ നടത്താനും ഡ്രോണുകൾ ഉപയോഗിക്കുമെന്നും എസ്ബിഐ പറഞ്ഞു.

ഫാസ്റ്റ് ട്രാക്ക് മോഡിൽ ചോദ്യങ്ങളും ക്ലെയിമുകളും കൈകാര്യം ചെയ്യുന്നതിനായി എസ്‌ബി‌ഐ ജനറൽ ഇൻഷുറൻസ് ഒരു ടാസ്‌ക് ഫോഴ്‌സ് രൂപീകരിച്ചിട്ടുണ്ട്. ചെറിയ ക്ലെയിമുകൾ‌ തൽക്ഷണം സെറ്റിൽ‌മെന്റ് ചെയ്യുന്നതിനാണ് ടാസ്‌ക് ഫോഴ്‌സ് രൂപീകരിച്ചത്. 10 ലക്ഷം രൂപയുടെ ക്ലെയിം വരെയാണ് ഇത്തരത്തിൽ തീർപ്പാക്കുക. ക്ലെയിം സെറ്റിൽമെന്റ് പ്രക്രിയയിൽ സമയം നഷ്ടപ്പെടാതിരിക്കാൻ കമ്പനി സർവേയർമാരുടെ ഒരു പാനലിനെ സമീപിച്ചിട്ടുമുണ്ട്.

Also Read: അദാനി കമ്പനികളിൽ നിക്ഷേപമുള്ളവര്‍ ലക്ഷപ്രഭുക്കൾ

പശ്ചിമ ബംഗാൾ, ഒഡീഷ എന്നിവിയങ്ങളിലെ ചുഴലിക്കാറ്റ് ബാധിച്ച പ്രദേശങ്ങളിൽ ക്ലെയിം പ്രോസസ്സിങ്ങിനും സെറ്റിൽമെന്റിനും പുതിയ സംവിധാനങ്ങൾ സഹായിക്കും. യാസ് ചുഴലിക്കാറ്റ് ആഞ്ഞടിച്ച ഈ സംസ്ഥാനങ്ങളിൽ തീരദേശ ഗ്രാമങ്ങളിലും കൃഷിസ്ഥലങ്ങളിലും വൻ നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്. വീടുകൾ, കെട്ടിടങ്ങൾ, വിളകൾ എന്നിവ ഉൾപ്പടെയുള്ളവയ്ക്കും നാശം സംഭവിച്ചിട്ടുണ്ട്. 130-145 കിലോമീറ്റർ വേഗതയിലാണ് കാറ്റ് വീശിയത്.