ചില്ലറ കച്ചവടക്കാർക്ക് ഡിജിറ്റൽ പേയ്മെന്റ് സൗകര്യമൊരുക്കാൻ എസ്ബിഐയും എച്ച്‌യു‌എല്ലും ഒന്നിക്കുന്നു

കൊച്ചി: രാജ്യത്തെ ചില്ലറ കച്ചവടകാർക്കും ഉപഭോക്താക്കൾക്കും ഡിജിറ്റൽ പേയ്മെന്റ് സൗകര്യമൊരുക്കാൻ സ്റ്റേറ്റ് ബാങ്ക് ഓഫ് ഇന്ത്യയും (എസ്‌ബി‌ഐ) ഹിന്ദുസ്ഥാൻ യൂണിലിവർ ലിമിറ്റഡും (എച്ച്‌യു‌എൽ) കൈകോർക്കുന്നു. ഡിജിറ്റൽ പേയ്മെന്റ് സംവിധാനമൊരുക്കി ചില്ലറ വ്യാപാരികളുടെ ആവശ്യങ്ങൾ നിറവേറ്റുക, അവർക്ക് ധനസഹായം നൽകുക തുടങ്ങിയ ലക്ഷ്യത്തോടെയാണ് എസ്ബിഐയും എച്ച്‌യു‌എല്ലും ഒന്നിക്കുന്നത്.

എച്ച്‌യു‌എൽ റീട്ടെയിലർമാർക്കും വിതരണക്കാർക്കും ഓണ്‍ലൈന്‍ പ്ലാറ്റ്‌ഫോം വഴി തടസരഹിതമായ സേവനങ്ങള്‍ ഉറപ്പാക്കുന്നതിനാണ് രാജ്യത്തെ രണ്ടു പ്രമുഖ കമ്പനികൾ പങ്കാളിത്തത്തിൽ ഏർപ്പെടുന്നത്. റീട്ടെയിലർമാരെയും വിതരണക്കാരെയും ഡിജിറ്റലായി ശാക്തീകരിക്കാൻ ഈ പങ്കാളിത്തം സഹായിക്കും. പുതിയ സംവിധാനം വഴി വിതരണക്കാരുമായുള്ള ബില്ലിംഗിൽ ചില്ലറ വ്യാപാരികൾക്ക് 50,000 രൂപ വരെ തൽക്ഷണ പേപ്പർലെസ് ഓവർ ഡ്രാഫ്റ്റ് സൗകര്യവും എച്ച്‌യു‌എൽ വിതരണക്കാർക്ക് ധനസഹായ സൗകര്യവും എസ്ബിഐ വാഗ്ദാനം ചെയ്യും.

Also Read: ലോക്ക് ഡൗണിൽ ബുക്ക് ചെയ്ത വിമാന ടിക്കറ്റുകൾ റദ്ദാക്കിയവർക്ക് മുഴുവൻ തുകയും റീഫണ്ടായി ലഭിക്കും

ചെറിയ പട്ടണങ്ങളിലെ ഉപയോക്താക്കൾക്ക് ഡിജിറ്റൽ പേയ്‌മെന്റ് സൗകര്യം ഉറപ്പാക്കുന്നതിന് ബാങ്ക് രാജ്യത്തുടനീളം ഒന്നിലധികം എച്ച്‍യുഎൽ ടച്ച് പോയിന്റുകളിൽ എസ്‌ബി‌ഐ പോയിന്റ് ഓഫ് സെയിൽ (പി‌ഒ‌എസ്) മെഷീനുകൾ സ്ഥാപിക്കും. എച്ച്‌യു‌എൽ റീട്ടെയിലർ ആപ്ലിക്കേഷനായ ശിഖർ വഴി യുപിഐ അടിസ്ഥാനമാക്കിയുള്ള പേയ്മെന്റ് സംവിധാനവും എസ്‌ബി‌ഐ ഒരുക്കും.

ഡീലർമാർക്ക് തടസ്സരഹിതവും സുരക്ഷിതവും തൽക്ഷണ പണരഹിതവുമായ പേയ്‌മെന്റുകൾ നടത്തുന്നതിനായാണ് യുപിഐ അടിസ്ഥാനമാക്കിയുള്ള പേയ്മെന്റ് സംവിധാനം ബാങ്ക് ഒരുക്കുന്നത്. കൂടാതെ എച്ച്‌യു‌എല്ലിന്റെ ഇൻ‌ട്രാനെറ്റിൽ‌ ഹോസ്റ്റ് ചെയ്‌തിരിക്കുന്ന എസ്‌ബി‌ഐ മൈക്രോസൈറ്റ് വഴി കോർപ്പറേറ്റ് ശമ്പള പാക്കേജിന്റെ ഓപ്ഷനും ബാങ്ക് എച്ച്‌യു‌എൽ ജീവനക്കാർക്ക് വാഗ്ദാനം ചെയ്യും.