എസ്ബിഐ 30 ശതമാനം ശാഖകള്‍ പൂട്ടുന്നു

മുംബൈ: രാജ്യത്തെ ഏറ്റവും വലിയ ബാങ്ക് ശൃംഖലയായ സ്റ്റേറ്റ് ബാങ്ക് ഓഫ് ഇന്ത്യ 30 ശതമാനത്തോളം ശാഖകള്‍ പൂട്ടുകയോ സ്ഥാനം മാറ്റുകയോ ചെയ്തേക്കും. ഉപഭോക്താക്കളുടെ സൗകര്യം കണക്കിലെടുത്താണ് പുതിയ മാറ്റങ്ങള്‍ എന്നാണ് അധികൃകരുടെ വിശദീകരണം. ആഗോള കണ്‍സള്‍ട്ടന്‍സി സ്ഥാപനമായ മകിന്‍സിയുടെ ഉപദേശപ്രകാരമാണ് ഇത്.

എസ്ബിഐ ചെലവ് ചുരുക്കുന്നതിന്‍റെ ഭാഗമായി 400 ശാഖകള്‍ അടുത്ത കാലത്തായി പൂട്ടുകയോ സ്ഥാനം മാറ്റുകയോ ചെയ്തിരുന്നു. നിലവില്‍ 16,784 ശാഖകള്‍ ഉള്ള ബാങ്കിലേക്ക് അസോസിയേറ്റ് ബാങ്കുകളുടെ 6,978 ശാഖകള്‍ കൂടി ഈ സാമ്പത്തിക വര്‍ഷത്തിന്‍റെ അവസാനത്തോടെ ലയിക്കും.

ഓരോ ശാഖകള്‍ വഴി ലഭിക്കുന്ന ബിസിനസ്സ് കൂടി പരിഗണിച്ച ശേഷം 50 മീറ്റര്‍ മുതല്‍ ഒരു കിലോമീറ്റര്‍ വരെ ചുറ്റളവില്‍ രണ്ട് ശാഖകള്‍ ഉണ്ടെങ്കില്‍ അതിലൊന്ന് പൂട്ടുന്ന കാര്യം തീരുമാനിക്കും.