ഓഹരി വിപണിയില്‍ ഇടിവ്; സെന്‍സെക്സ് 434 പോയിന്‍റുകള്‍ ഇടിഞ്ഞു

കൊച്ചി: ഓഹരി വിപണിയില്‍ ഇടിവ്. മുംബൈ സ്റ്റോക്ക് എക്സ്ചേഞ്ച് സൂചികയായ സെന്‍സെക്സ് 433.56 പോയിന്‍റുകള്‍ ഇടിഞ്ഞു. 37,673.31 എന്ന നിലവാരത്തിലാണ് വ്യാപാരം അവസാനിപ്പിച്ചത്.
നാഷണല്‍ സ്റ്റോക്ക് എക്സ്ചേഞ്ച് സൂചികയായ നിഫ്റ്റി 139.25 പോയിന്‍റ് ഇടിഞ്ഞ് 11,174.75 എന്ന നിലവാരത്തിലാണ് വ്യാപാരം അവസാനിപ്പിച്ചത്.

അടിസ്ഥാന സൗകര്യ വികസനം, ഓയില്‍ ഓട്ടോ മൊബൈല്‍, ധനകാര്യ സേവന രംഗം, ലോഹം, ഫാര്‍മ തുടങ്ങിയ മേഖലകളിലെ ഓഹരികളാണ് കൂടുതല്‍ ഇടിഞ്ഞത്. ആര്‍.ബി.ഐ അടിസ്ഥാന പലിശ നിരക്കുകളില്‍ .25 ശതമാനം കുറവ് വരുത്തിയിരുന്നു. എന്നാല്‍ ധനകാര്യ വിദഗ്ധര്‍ ഈ രംഗത്ത് കൂടുതല്‍ നിരക്ക് കുറവ് പ്രതീക്ഷിച്ചിരുന്നു.സാമ്പത്തിക വളര്‍ച്ച കുറഞ്ഞു നില്‍ക്കുന്ന സമയമായതിനാല്‍ കേന്ദ്ര ബാങ്ക് അടിസ്ഥാന നിരക്കുകള്‍ 40 ബി.പി.എസ് വരെ കുറച്ചേക്കും എന്ന സൂചനകള്‍ ഉണ്ടായിരുന്നു.

റിപ്പോ നിരക്ക് 4.5 ശതമാനത്തിനും 6.5 ശതമാനത്തിനും ഇടയില്‍ നില നിര്‍ത്തും എന്നായിരുന്നു അഭ്യൂഹങ്ങള്‍. എന്നാല്‍ 5.15 ശതമാനമായി മാത്രമാണ് കേന്ദ്ര ബാങ്ക് റിപ്പോ നിരക്ക് കുറച്ചത്. 2019-20 സാമ്പത്തിക വര്‍ഷങ്ങളിലെ വളര്‍ച്ച കുറഞ്ഞേക്കുമെന്ന ആര്‍.ബി.ഐ യുടെ സൂചനകളും വിപണിയെ പിന്നോട്ടടിച്ചു. വാഹന വില്‍പ്പനയില്‍ ഉണ്ടായ ഇടിവ് വാഹന വിപണിയിലെ കമ്പനികളുടെ ഓഹരികളെ സാരമായി ബാധിച്ചിട്ടുണ്ട്.


Also Read: ആര്‍ബിഐ റിപ്പോ നിരക്ക് കാല്‍ ശതമാനം കുറച്ചു