ഓഹരി വിപണി സൂചികകളിൽ വ്യാപാരം നേട്ടത്തോടെ

മുംബൈ: വാരമധ്യത്തിൽ ഓഹരി വിപണി സൂചികകൾ വ്യാപാരം നേട്ടത്തോടെ ആരംഭിച്ചു. വ്യാപാരം ആരംഭിച്ചയുടൻ സെന്‍സെക്‌സ് 104 പോയിൻ്റ് ഉയര്‍ന്ന് 33,995ലെത്തിയപ്പോൾ നിഫ്റ്റി 32 പോയിൻ്റ് നേട്ടത്തില്‍ 10230ലുമെത്തി. ബിഎസ്ഇയിലെ 870 കമ്പനികളുടെ ഓഹരികള്‍ നേട്ടം കൈവരിച്ചപ്പോൾ 429 ഓഹരികള്‍ നഷ്ടം നേരിട്ടു.

സണ്‍ ഫാര്‍മ, എച്ച്‌സിഎല്‍ ടെക്, സിപ്ല, ഇന്ത്യബുള്‍സ് ഹൗസിങ്, യെസ് ബാങ്ക്, ഇന്‍ഫോസിസ്, യുപിഎല്‍, എച്ച്ഡിഎഫ്‌സി, എസ്ബിഐ, ഐഒസി, ഹീറോ മോട്ടോര്‍കോര്‍പ് എന്നീ ഓഹരികള്‍ നേട്ടം കൊയ്തപ്പോൾ ഹിന്‍ഡാല്‍കോ, ഡോ.റെഡ്ഡീസ് ലാബ്, കോള്‍ ഇന്ത്യ, ടാറ്റ സ്റ്റീല്‍, എല്‍ആൻ്റ്‍‍ടി, പവര്‍ ഗ്രിഡ് കോര്‍പ്, എച്ച്ഡിഎഫ്‌സി ബാങ്ക്, ഐഷര്‍ മോട്ടോഴ്‌സ്, ഐടിസി തുടങ്ങിയ ഓഹരികള്‍ നഷ്ടത്തിലാണ്.

അതേസമയം ഡോളറിനെതിരെ രൂപയുടെ മൂല്യം വീണ്ടും ഇടിയുകയാണ്. കേന്ദ്ര സര്‍ക്കാരും റിസര്‍വ് ബാങ്കും തമ്മില്‍ തുടരുന്ന തര്‍ക്കമാണ് രൂപ സാരമായി ബാധിക്കുന്നത്. റിസര്‍വ് ബാങ്ക് ഗവര്‍ണര്‍ ഊര്‍ജിത് പട്ടേല്‍ രാജിക്കൊരുങ്ങുന്നെന്ന റിപ്പോര്‍‍ട്ടുകള്‍ കൂടി പുറത്ത് വന്നതോടെ രൂപ വീണ്ടും തകരുകയായിരുന്നു. നിലവിൽ ഡോളറിനെതിരെ രൂപയുടെ മൂല്യം 74.08 ആണ്. രൂപയുടെ മൂല്യത്തിൽ ഇന്ന് 40 പൈസുടെ ഇടിവാണ് ഉണ്ടായിട്ടുള്ളത്.