ചരിത്രത്തിലാദ്യമായി സെൻസെക്സ് 37,000 കടന്നു

മുംബൈ: ചരിത്രത്തിലാദ്യമായി ഓഹരിവിപണിയിൽ സെൻസെക്സ് സൂചിക 37,000 കടന്നു. വ്യാപാരം ആരംഭിച്ചയുടൻ ഓഹരി സൂചികികള്‍ റെക്കോഡ് നേട്ടം സ്വന്തമാക്കി മുന്നേറി. സെന്‍സെക്‌സ് 80 പോയിന്‍റ് ഉയര്‍ന്ന് 36938ലെത്തിയപ്പോൾ നിഫ്റ്റി 26 പോയിന്‍റ് നേട്ടത്തില്‍ 11158ലുമെത്തി. ബിഎസ്ഇയിലെ 1061 കമ്പനികളുടെ ഓഹരികള്‍ നേട്ടം കൊയ്തപ്പോൾ 585 ഓഹരികള്‍ നഷ്ടം നേരിട്ടു. കമ്പനികളുടെ പ്രവര്‍ത്തനഫലങ്ങളോടൊപ്പം തന്നെ ജിഎസ്ടി കൗണ്‍സില്‍ ഉത്പന്നങ്ങളുടെ നികുതി കുറച്ചതും വിപണിക്ക് കരുത്തായി.

എച്ച്ഡിഎഫ്‌സി, റിലയന്‍സ്, സണ്‍ ഫാര്‍മ, ബജാജ് ഓട്ടോ,എസ്ബിഐ, ലുപിന്‍, ഡോ.റെഡ്ഡീസ് ലാബ്, ടാറ്റ മോട്ടോഴ്‌സ്, ഐടിസി, സിപ്ല, എച്ച്ഡിഎഫ്‌സി ബാങ്ക്, ഒഎന്‍ജിസി, മാരുതി സുസുകി തുടങ്ങിയ ഓഹരികള്‍ നേട്ടം കൊയ്തപ്പോൾ ഹീറോ മോട്ടോര്‍കോര്‍പ്, ആക്‌സിസ് ബാങ്ക്, ടാറ്റ സ്റ്റീല്‍, ഹിന്‍ഡാല്‍കോ, ടിസിഎസ്, ടെക് മഹീന്ദ്ര, ഏഷ്യന്‍ പെയിന്‍റ്സ്, വിപ്രോ തുടങ്ങിയ ഓഹരികള്‍ നഷ്ടം നേരിട്ടു.