1,000 രൂപയ്ക്ക് കൊറോണ വാക്സിൻ; പരീക്ഷണവുമായി ഇന്ത്യൻ കമ്പനി

കൊച്ചി: ദിവസേന ആയിരക്കണക്കിന് ആളുകളെ ഭൂമുഖത്ത് നിന്ന് തുടച്ചു നീക്കുന്ന കൊറോണ വൈറസിനെതിരെ വാക്സിൻ കണ്ടു പിടിയ്ക്കാൻ ലോക രാജ്യങ്ങൾ പരീക്ഷണത്തിൽ ആണ്. യുഎസും റഷ്യയും ചൈനയുമെല്ലാം വാക്സിൻ പരീക്ഷത്തിൽ ഏർപ്പെട്ടു കഴിഞ്ഞു.

ഇന്ത്യൻ കമ്പനിയുടെ നേതൃത്വത്തിലുമുണ്ട് വാക്സിൻ പരീക്ഷണം. സെറം ഇൻസ്റ്റിറ്റ്യൂട്ട് ഓഫ് ഇന്ത്യയാണ് പരീക്ഷണം നടത്തുന്നത്. പൂനൈ കേന്ദ്രീകരിച്ച് പ്രവ‍ര്‍ത്തിയ്ക്കുന്ന കമ്പനി ലോകത്തിലെ തന്നെ ഏറ്റവും വലിയ വാക്സിൻ നി‍ര്‍മാതാക്കൾ ആണ്.

Also Read: കൊറോണയ്ക്ക് ശേഷം 50 ശതമാനം ജോലികൾ ഇല്ലാതായേക്കും എന്ന് ഐഎൽഒ

150 കോടി ഡോസ് വാക്സിൻ നി‍ര്‍മിയ്ക്കുന്ന കമ്പനി ലോകമെമ്പാടുമുള്ള 65 ശതമാനത്തോളം കുട്ടികൾക്ക് വിവിധ വാക്സിനുകൾ നൽകുന്നുണ്ട്. യുഎസിലെ ബയോടെക്നോളജി കമ്പനിയായ കൊഡജെനിക്സ്, യുകെയിലെ ഒക്സ്ഫോഡ് യൂണിവേഴ്സിറ്റി എന്നിവയുമായി ചേർന്നും കമ്പനി കൊറോണ വാക്സിൻ പരീക്ഷണങ്ങളിൽ ഏർപ്പെട്ടിട്ടുണ്ട്.

വാക്സിൻ വിജയിപ്പിക്കാനായാൽ 1000 രൂപയ്ക്ക് വിപണിയിൽ എത്തിക്കുകയാണ് ലക്ഷ്യം. പരീക്ഷണം നടത്തുമ്പോൾ തന്നെ നിർമാണത്തിനാവശ്യമായ നടപടികളും തുടങ്ങിയതായി സെറം ഇൻസ്റ്റിറ്റ്യൂട്ട് ഓഫ് ഇന്ത്യ സിഇഒ അദർ പൂനവല്ല വ്യക്തമാക്കിക്കഴിഞ്ഞു. ട്രയൽ വിജയമായാൽ സെപ്റ്റംബർ-ഒക്ടോബറോടെ വാക്സിൻ വിപണിയിൽ എത്തിയ്ക്കാനാകും. മെയിലാണ് ഇന്ത്യയിൽ മനുഷ്യരിൽ മരുന്നു പരീക്ഷണം നടത്തുക. പരീക്ഷണം വിജയമായാൽ ചുരുങ്ങിയ സമയം കൊണ്ട് മരുന്നുകൾ വിപണിയിൽ എത്തിയ്ക്കാനുള്ള സംവിധാനം കമ്പനിയ്ക്കുണ്ട്.