899 രൂപയ്ക്ക് വിമാന ടിക്കറ്റ്, ഒപ്പം 2000 രൂപയുടെ വൗച്ചറും; '1+1' ഓഫറുമായി സ്പൈസ്ജെറ്റ്

ഡൽഹി: കൊറോണ വൈറസ് മൂലം പ്രതിസന്ധിയിലായ വ്യോമയാന കമ്പനികൾ വ്യത്യസ്ത ഡിസ്ക്കൗണ്ട് ഓഫറുകളുമായി യാത്രക്കാരെ ആകർഷിക്കുകയാണ്. നേരത്തെ കൊവിഡ്-19ന്റെ പശ്ചാത്തലത്തിൽ യാത്രക്കാര്‍ക്ക് കുറഞ്ഞ നിരക്കിൽ രണ്ട് സീറ്റുകൾ ബുക്ക് ചെയ്യാൻ ആഭ്യന്തര വിമാനക്കമ്പനിയായ ഇൻഡിഗോ അവസരമൊരുക്കിയിരുന്നു. ഇതിന് പിന്നാലെ മറ്റൊരു വിൽപന തന്ത്രവുമായി എത്തിയിരിക്കുകയാണ് സ്പൈസ്ജെറ്റ് എയർലൈൻസ്.

'1+1 ഓഫർ' എന്ന പേരിലാണ് സ്പൈസ്ജെറ്റ് പുതിയ ഡിസ്കൗണ്ട് സെയിൽ അവതരിപ്പിച്ചിരിക്കുന്നത്. ഈ ഓഫർ പ്രകാരം ആഭ്യന്തര യാത്രയ്ക്ക് നികുതി ഉൾപ്പെടെ 899 രൂപ വരെ കുറഞ്ഞ വൺ-വേ ബേസ് നിരക്കിലുള്ള ടിക്കറ്റുകൾ കമ്പനി വാഗ്ദാനം ചെയ്യുന്നു. ലിമിറ്റഡ് പിരീഡ് ഓഫറായ '1+1' വിൽപന തിങ്കളാഴ്ചയാണ് ആരംഭിച്ചത്. അഞ്ചുദിവസം നീണ്ടുനിൽക്കുന്ന വിൽപന ഓഗസ്റ്റ് ഏഴിന് അവസാനിക്കും. ഏറ്റവും കുറഞ്ഞ നിരക്കിൽ ടിക്കറ്റ് ലഭ്യമാക്കുന്നതിനൊപ്പം ടിക്ക്റ്റ് ബുക്ക് ചെയ്യുന്ന യാത്രക്കാർക്ക് പരമാവധി 2000 രൂപയുടെ കോംപ്ലിമെന്ററി ഫ്ലൈറ്റ് വൗച്ചർ ലഭിക്കും.

Also Read: സ്ഥിര നിക്ഷേപത്തിന് ഏറ്റവും ഉയര്‍ന്ന പലിശ നിരക്കുകൾ നൽകുന്ന ബാങ്കുകൾ

ഭാവിയിൽ ടിക്കറ്റ് ബുക്ക് ചെയ്യുമ്പോൾ ഈ വൗച്ചർ ഉപയോഗിക്കാനാകും. ടിക്കറ്റ് ബുക്കിംഗ് കഴിഞ്ഞ് 48 മണിക്കൂറിനുള്ളിൽ വൗച്ചർ ഉപഭോക്താവിന് അയക്കും. 2020 ഒക്ടോബർ 15 വരെയുള്ള യാത്രകൾക്കായി ടിക്കറ്റ് ബുക്ക് ചെയ്യുന്നവരാണ് ഓഫറിന് അർഹരായിരിക്കുക എന്നും സ്‌പൈസ് ജെറ്റ് പത്രക്കുറിപ്പിൽ അറിയിച്ചു. ഇതുകൂടാതെ 499 രൂപയ്ക്ക് സ്‌പൈസ് മാക്‌സിലേക്ക് അപ്‌ഗ്രേഡ് ചെയ്യുന്നവർക്ക് ആഡ്-ഓൺ ഓഫറുകളും എയർലൈൻ പുറത്തിറക്കി.

ഹൈദരാബാദ് - ബെൽഗാം, ബെൽഗാം - ഹൈദരാബാദ്, അഹമ്മദാബാദ് - അജ്മീർ (കിഷൻഗഡ്), അജ്മീർ (കിഷൻഗഡ്) - അഹമ്മദാബാദ് എന്നിവിടങ്ങളിലെ യാത്രയ്ക്കാണ് 899 രൂപ നിരക്കിൽ ടിക്കറ്റ് ലഭിക്കുക. ശ്രദ്ധിക്കേണ്ട പ്രധാനപ്പെട്ട കാര്യം ഓഫർ പ്രകാരം ബുക്ക് ചെയ്ത ടിക്കറ്റുകൾ ഉപയോക്താക്കൾക്ക് കൈമാറ്റം ചെയ്യാനോ തിരികെ നൽകാനോ സാധിക്കില്ല. അതേസമയം യാത്രക്കാർക്ക് കുറഞ്ഞനിരക്കിൽ ടിക്കറ്റുകൾ ലഭ്യമാക്കുന്ന '1 + 1ഓഫർ' സേവനം നിർത്താൻ ഏവിയേഷൻ റെഗുലേറ്റർ ആയ ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ) തിങ്കളാഴ്ച സ്‌പൈസ്ജെറ്റിനോട് ആവശ്യപ്പെട്ടിട്ടുണ്ട്.

Read More: കൊവിഡ് 19; യാത്രക്കാര്‍ക്ക് കുറഞ്ഞ നിരക്കിൽ രണ്ട് സീറ്റുകൾ ബുക്ക് ചെയ്യാൻ അവസരമൊരുക്കി ഇൻഡിഗോ