2,000 രൂപയ്ക്ക് ഇൻക്യുബേറ്ററുമായി 10-ാം ക്ലാസുകാരൻ

കൊച്ചി: കണ്ടുപിടിത്തങ്ങൾക്ക് പ്രായം ഒന്നും ഒരു തടസമേയല്ല. വിപണിയിൽ 10,000 രൂപ വിലയുള്ള ഇൻക്യുബേറ്റര്‍ വെറും 2,000 രൂപയ്ക്ക് നിര്‍മിച്ച് വാര്‍ത്തകളിൽ ഇടം നേടുകയാണ് ഒരു പത്താംക്ലാസ് വിദ്യാര്‍ത്ഥി. ഈ കൊച്ചു ശാസ്ത്ര പ്രതിഭ നിര്‍മിച്ച 25-ഓളം ഇൻക്യുബേറ്ററുകൾ ആവശ്യക്കാര്‍ കൊണ്ടു പോയിക്കഴിഞ്ഞു.

മലയാറ്റൂര്‍ സെൻറ്മേരീസ് ഹയര്‍സെക്കൻഡറി സ്കൂൾ വിദ്യാര്‍ത്ഥിയാണ് ലിബിൻ. സ്കൂൾ ശാസ്ത്രമേളകളാണ് ലിബിൻെറ കണ്ടുപിടിത്തത്തിന് പ്രചോദനമായത്. ഓൺലൈൻ പഠനത്തിന് ശേഷമുള്ള സമയമാണ് ഈ കൊച്ചു മിടുക്കൻ കണ്ടുപിടുത്തത്തിനായി മാറ്റി വച്ചത്.

Also Read: ബിസിനസ് തുടങ്ങാൻ ആഗ്രഹിയ്ക്കുന്നവര്‍ക്കും ബിസിനസ് ഉള്ളവര്‍ക്കും ആശ്രയിക്കാവുന്ന ലോണുകൾ

അര മണിക്കൂര്‍ കൊണ്ട് ഇൻക്യുബേറ്റര്‍ തയ്യാറാക്കും ഈ മിടുക്കൻ. ആദ്യം നിര്‍മിച്ച ഇൻക്യുബേറ്ററിൽ 40 കോഴി മുട്ട വിരിയ്ക്കാൻ ആയത് ആവശ്യക്കാര്‍ക്ക് നിര്‍മിച്ച് നൽകാൻ ആത്മവിശ്വാസം നൽകി. തടിയും തെര്‍മോ കോളും ഉപയോഗിച്ചാണ് നിര്‍മാണം. 2,000 രൂപയ്ക്ക് ഇൻക്യുബേറ്റര്‍ വിൽക്കാൻ ആയത് ചെറിയ ആശ്വാസം അല്ല കുടുംബത്തിന് നൽകുന്നത്. ഇലക്ട്രിക്കൽ എൻജിനിയര്‍ ആകാനാണ് ഈ കൊച്ചു മിടുക്കന് ആഗ്രഹം .

ഇതുവരെ 30-35 ഓര്‍ഡറുകൾ ഇൻക്യുബേറ്ററിന് ലഭിച്ചതായി ലിബിൻ പറയുന്നു. അദ്ധ്യാപകരാണ് സമൂഹ മാധ്യമങ്ങളിലൂടെ ആദ്യം ലിബിൻെറ ഇൻക്യുബേറ്റര്‍ വിശേഷങ്ങൾ പങ്കു വെച്ചത്. അങ്ങനെ ഓര്‍ഡറുകളും കൂടി. ഇപ്പോൾ പിതാവ് നഷ്ടപ്പെട്ട കുടുംബത്തിന് ഇൻക്യുബേറ്റര്‍ നിര്‍മാണത്തിലൂടെ താങ്ങാകുകയാണ് ഈ കൊച്ചു മിടുക്കൻ. ഇൻക്യുബേറ്റര്‍ മാത്രമല്ല ഇൻവെര്‍ട്ടര്‍ ഉൾപ്പെടെ നിര്‍മിച്ചിട്ടുണ്ട് ലിബിൻ. കണ്ടുപിടുത്തങ്ങൾ വീട്ടിൽ തന്നെ പരീക്ഷിച്ച് വിജയിപ്പിച്ചിട്ടുള്ളതിനാൽ വീട്ടുകാരും ഈ മിടുക്കന് കട്ട സപ്പോര്‍ട്ട്.