സ്വന്തമായി ഇന്‍ക്യുബേറ്റർ നിർമ്മിച്ചു; കോഴി മുട്ടകൾ വിരിയിച്ച് ഈ മിടുക്കൻമാർ സമ്പാദിക്കുന്നത് പതിനായിരങ്ങൾ

കൊവിഡ് കാലത്ത് മികച്ച വരുമാനമുണ്ടാക്കി കയ്യടി നേടുകയാണ് കൊല്ലത്തുനിന്നുള്ള രണ്ടു കൊച്ചുമിടുക്കൻമാർ. കൊല്ലം തൊടിയൂരില്‍ നിന്നുള്ള വിദ്യാർഥികളായ അസ്ഹറും അല്‍താഫുമാണ് ഈ ബിസിനസ്സിന് പിന്നിൽ. കോഴി മുട്ട അടവച്ച് വിരിയിച്ച് വിറ്റ് പ്രതിമാസം പതിനായിരത്തോളം രൂപയാണ് ഈ മിടുക്കൻമാർ സമ്പാദിക്കുന്നത്.

സ്വന്തമായി നിർമ്മിച്ച ഇന്‍ക്യുബേറ്റർ ഉപയോഗിച്ചാണ് ഇവർ കോഴി മുട്ടകൾ അടവച്ച് വിരിയിക്കുന്നത്. ശാസ്ത്രമേളയില്‍ പ്രദര്‍ശിപ്പിക്കാന്‍ വേണ്ടിയാണ് അസ്ഹറും അല്‍താഫും ചേര്‍ന്ന് ഇന്‍ക്യുബേറ്റര്‍ നിർമ്മിച്ചത്. പക്ഷെ അന്ന് മത്സരത്തിൽ വിജയിക്കാനായില്ല. ഇതിന് പിന്നാലെ ഇന്‍ക്യുബേറ്ററിന് ചില മാറ്റങ്ങള്‍ വരുത്തി അവരവരുടെ വീടുകളില്‍ കോഴികൂട് പണിതു. ആദ്യം എഴുപത് മുട്ട വച്ചായിരുന്നു തുടക്കം.



Also Read: പോസ്റ്റ് ഓഫീസ് സേവിംഗ്സ് അക്കൗണ്ട് ഉപയോഗിച്ച് സർക്കാർ സബ്സിഡികൾ നേടാം; അറിയാം ഇക്കാര്യങ്ങൾ

ഇതിൽ 50 വിരിഞ്ഞു. സംഗതി വിജയിച്ചതോടെ കോഴി മുട്ട അടച്ച് വിരിയിക്കുന്നത് പതിവാക്കി. കോഴി കുഞ്ഞുങ്ങളെ കൂടാതെ ആവശ്യക്കാര്‍ക്ക് ഇൻക്യുബേറ്ററും ഇവർ നിർമ്മിച്ച് നൽകുന്നുണ്ട്. പഠനത്തിലും മിടുക്കരായ ഇവരുടെ പുത്തൻ സംരഭത്തിന് രക്ഷിതാക്കളുടെയും അധ്യാപകരുടെയും പരിപൂര്‍ണ പിന്തുണയുണ്ട്.