Adani Group:അദാനി ഹിൻഡൻബർ​ഗ് വിഷയത്തിൽ സുപ്രീം കോടതി; 2 മാസത്തിനകം സെബി റിപ്പോർട്ട് സമർപ്പിക്കണം, വിദ​ഗ്ധ സമിതി രൂപീകരിച്ചു

അദാനി ഹിൻഡൻബർഗ് വിഷയത്തിൽ സുപ്രീം കോടതിയുടെ ഇടപെടൽ. രണ്ട് മാസത്തിനകം ഈ വിഷയത്തിൽ അന്വേഷണ റിപ്പോർട്ട് സമർപ്പിക്കാൻ സെബിയോട് സുപ്രീം കോടതി ആവശ്യപ്പെട്ടു. ഈ കാലയളവിനുള്ളിൽ കോടതിയുടെ മുമ്പാകെ റിപ്പോർട്ട് സമർപ്പിക്കണം. ഈ വിഷയത്തിൽ അന്വേഷണം നടത്താൻ കോടതി ഒരു വിദഗ്ധ സമിതിയെ രൂപീകരിച്ചു.

റിട്ടയർ ചെയ്ത ജഡ്ജിയായ അഭയ് മനോഹർ സാപ്രേയാണ് ഈ കമ്മിറ്റിയുടെ തലവൻ. പരിചയ സമ്പന്നരായ ബാങ്കിങ് വിദഗ്ധരമായ കെ വി കാമത്ത്, ഒ പി ഭട്, ഇൻഫോസിസ് സഹ സ്ഥാപകൻ നന്ദൻ നിലേകനി, റിട്ടയർ ജസ്റ്റിസ് ജെ പി ദേവ്ധർ എന്നിവരാണ് കമ്മിറ്റിയിലെ മറ്റ് അംഗങ്ങൾ.

Also Read : ഹിൻഡൻബർ​ഗ് ആരോപിച്ച സ്ഥലത്ത് ചെന്ന് 'അദാനിയുടെ ഹീറോയിസം'; 30% വരെ പറന്നുയർന്ന് അദാനി ഓഹരികൾ
ഹിൻഡൻബർഗിന്റെ ആരോപണങ്ങൾ സംബന്ധിച്ച് ഇപ്പോൾത്തന്നെ സെബിയുടെ അന്വേഷണം നടക്കുന്നുണ്ടെന്ന് സുപ്രീം കോടതി ബെഞ്ച് നിരീക്ഷിച്ചു. ഹിൻഡൻബർഗ് റിപ്പോർട്ട് പുറത്തു വന്ന ഉടൻ തന്നെ മാർക്കറ്റിലെ പ്രവർത്തനങ്ങൾ സെബി വിലയിരുത്തുകയും ചെയ്തിട്ടുണ്ട്.

നിലവിലെ അന്വേഷണത്തിന്റെ ഭാഗമായി സെബി ഇനി പറയുന്ന കാര്യങ്ങളും അന്വേഷിക്കണമെന്ന് സുപ്രീം കോടതി നിർദേശിച്ചു.

a) സെക്യൂരിറ്റീസ് കോൺട്രാക്ട്സ് റെഗുലേഷന്റെ റൂൾ 19 (a) യിൽ ലംഘനം നടന്നിട്ടുണ്ടോ?

b) നിയമപ്രകാരം റിലേറ്റഡ് പാർട്ടി ട്രാൻസാക്ഷനുകൾ ഡിസ്ക്ലോസ് ചെയ്യുന്നതിൽ വീഴ്ച വന്നിട്ടുണ്ടോ? കൂടാതെ നിയമം അനുശാസിക്കുന്ന, റിലേറ്റഡ് പാർട്ടി ട്രാൻസാക്ഷനുകളുമായി ബന്ധപ്പെടുന്ന പ്രധാന വിവരങ്ങൾ ഡിസ്ക്ലോസ് ചെയ്തിട്ടുണ്ടോ?

c) നിലവിൽ നില നിൽക്കുന്ന നിയമങ്ങളെ മറികടന്ന് ഓഹരിവിലകളിൽ കൃത്രിമം കാണിച്ചിട്ടുണ്ടോ?

Also Read : Rekha Jhunjhunwala Stocks : നോക്കിവെക്കാം രേഖ ജുൻജുൻവാലയുടെ 2 കിടിലൻ ഓഹരികൾ; പറന്നുയർന്ന് 24% വരെ ലാഭം നൽകുമെന്ന് വിലയിരുത്തൽ
സെബി നിലവിൽ നടത്തിക്കൊണ്ടിരിക്കുന്ന അന്വേഷണം പരിമിതപ്പെടുത്തുന്ന രീതിയിൽ വ്യാഖ്യാനങ്ങൾക്ക് മുതിരില്ലെന്ന് കോടതി അറിയിച്ചു. വേഗത്തിൽ അന്വേഷണം അവസാനിപ്പിച്ച്, രണ്ട് മാസത്തിനുള്ളിൽ റിപ്പോർട്ട് സമർപ്പിക്കണം. തുടർന്ന് സ്റ്റാറ്റസ് റിപ്പോർട്ട് ഒരു ഫയലായി സമർപ്പിക്കണമെന്നും കോടതി നിർദേശിച്ചു.

Read Latest Business News and Malayalam News