ഓൺലൈൻ പലവ്യഞ്ജന വിൽപ്പനയിലേക്ക് കടക്കാൻ ഒരുങ്ങി ടാറ്റ

മുംബൈ: ഓൺലൈൻ പല വ്യഞ്ജന വിൽപ്പന രംഗ ത്തും സാന്നിധ്യം അറിയിക്കാൻഒരുങ്ങുകയാണ് ടാറ്റ ഗ്രൂപ്പ്. ഓൺലൈൻ ഗ്രോസറി പ്ലാറ്റ്‍ഫോം ആയ ബിഗ്ബാസ്ക്കറ്റിൽ ഗ്രൂപ്പ് വൻ തുക മുതൽ മുടക്കിയേക്കും എന്നാണ് സൂചന. മലയാളിയായ ഹരി മേനോന്‍ നേതൃത്വം നൽകുന്ന സ്റ്റാര്‍ട്ടപ്പ് ആണ് ബിഗ് ബാസ്ക്കറ്റ്. ആയിരത്തി അഞ്ഞൂറ് കോടി രൂപയോളം സമാഹരിയ്ക്കാൻ ഒരുങ്ങുകയാണ് കമ്പനി.

അടുത്ത രണ്ട് വര്‍ഷത്തിനുള്ളിൽ പ്രാഥമിക ഓഹരി വിൽപ്പനയ്ക്ക് തയ്യാറെടുക്കാനും പദ്ധതിയുണ്ട്.ടാറ്റയെ കൂടാതെ യുഎസ് കേന്ദ്രീകരിച്ച് പ്രവര്‍ത്തിയ്ക്കുന്ന ജനറേഷന്‍ ഇന്‍വെസ്റ്റ്‌മെന്റ് മാനേജ്‌മെൻറ് കമ്പനി ഉൾപ്പെടെ ബിഗ്ബാസ്ക്കറ്റിൽ മുതൽ മുടക്കാൻ സന്നദ്ധത അറിയിച്ചിട്ടുണ്ട് എന്നാണ് സൂചന.
ഓൺലൈൻ സാന്നിധ്യം കൂടുതൽ വിപുലീകരിയ്ക്കാൻ തയ്യാറെടുക്കുന്ന ടാറ്റയ്ക്ക് ബിഗ്ബാസ്ക്കറ്റുമായുള്ള പങ്കാളിത്തം സഹായകരമായേക്കും. അടുത്തിടെ ഓൺലൈൻ രംഗത്ത് വിവിധ മേഖലകളെ കൂട്ടിയിണക്കി സമഗ്രമായ വിൽപ്പന പ്ലാറ്റ്ഫോം അവതരിപ്പിയ്ക്കുന്നതിനുള്ള പ്ലാൻ ടാറ്റ ഗ്രൂപ്പ് വ്യക്തമാക്കിയിരുന്നു

Also Read: ടാറ്റയുടെ ഡിജിറ്റൽ ബിസിനസിൽ മുതൽ മുടക്കാനൊരുങ്ങി വാൾമാര്‍ട്ട്

ലോക്ക്ഡൗൺ കാലത്ത് ഇ-കൊമേഴ്സ് സൈറ്റുകളുടെ വിൽപ്പന ഉയര്‍ന്നതിന് ഒപ്പം ഓൺലൈൻ ഗ്രോസറി പ്ലാറ്റ് ഫോം ആയ ബിഗ്ബാസ്കക്റ്റിൻെറയും വിൽപ്പന ഉയര്‍ന്നിരുന്നു. രാജ്യമെമ്പാടും സാന്നിധ്യം അറിയിക്കാനാണ് കമ്പനി തയ്യാറെടുക്കുന്നത്.

100 കോടി ഡോളറിന് മുകളിൽ മൂല്യമുള്ള യൂണികോണ്‍ സ്റ്റാര്‍ട്ട് അപ്പ് ആണ് ബിഗ് ബാസ്‌കറ്റ്. കഴിഞ്ഞ വര്‍ഷം 150 ദശലക്ഷം ഡോളര്‍ ബിഗ് ബാസ്‌കറ്റ് സമാഹരിച്ചു എന്നാണ് സൂചന. 2020 സാമ്പത്തിക വര്‍ഷത്തിൽ 6,300 കോടി രൂപയുടെ വരുമാനം ആണ് കമ്പനി ലക്ഷ്യമിട്ടിരിയ്ക്കുന്നത്