എയര്‍ടെല്ലിന് പിന്നാലെ നിരക്കു വര്‍ധനയ്ക്ക് ഒരുങ്ങി വോഡഫോൺ ഐഡിയയും

ന്യൂഡൽഹി: എയര്‍ടെല്ലിന് പിന്നാലെ നിരക്കു വര്‍ധനയ്ക്ക് ഒരുങ്ങി വോഡഫോൺ ഐഡിയയും. കുറഞ്ഞ നിരക്കിൽ വോയിസ് സേവനങ്ങൾക്ക് ഒപ്പം ഡാറ്റ സേവനങ്ങളും നൽകുന്നത് മുതലാകില്ലെന്ന് സൂചിപ്പിയ്ക്കുകയാണ് ടെലികോം കമ്പനികൾ. കഴിഞ്ഞ ദിവസം എയര്‍ടെൽ നിരക്കുകൾ വര്‍ധിപ്പിയ്ക്കുമെന്ന് കമ്പനി അധികൃതര്‍ വ്യക്തമാക്കിയതിന് തൊട്ടുപിന്നാലെ വോഡഫോൺ ഐഡിയയും നിരക്ക് വര്‍ധനയുടെ സൂചന നൽകി രംഗത്ത് എത്തിയിരിക്കുകയാണ്.

വോഡഫോൺ ഐഡിയ സിഇഒ രവീന്ദ്രനാഥ് ടാക്കര്‍ ആണ് നിരക്ക് വര്‍ധനയുടെ സൂചന നൽകിയത്. എയര്‍ടെൽ ലക്ഷ്യമിട്ടിരിയ്ക്കുന്നത് പോലെ തന്നെ ഒരുഉപഭോക്താവിൽ നിന്നുള്ള ശരാശരി വരുമാനം 200 രൂപ മുതൽ 300 രൂപ വരെയായി ഉയര്‍ത്തുകയാണ് ലക്ഷ്യമെന്ന് താക്കര്‍ വ്യക്തമാക്കി. നിലവിൽ ലോകത്തിൽ തന്നെ ഏറ്റവും കുറഞ്ഞ നിരക്കുകളിൽ ഒന്നാണ് ഇന്ത്യയിൽ. ഇത് ലാഭകരമല്ലെന്നാണ് എല്ലാ ടെലികോം കമ്പനികളും ഒരുപോലെ അവകാശപ്പെടുന്നത്.

Also Read: എയര്‍ടെൽ ടെലികോം നിരക്കുകൾ ഉയരും

2019 ഡിസംബറിൽ ടെലികോം കമ്പനികൾ വോയിസ്, ഡാറ്റ സേവനങ്ങൾക്ക് നിരക്ക് കുത്തനെ ഉയര്‍ത്തിയിരുന്നു . അതേസമയം രാജ്യത്ത് വോയിസ്, ഡാറ്റ സേവനങ്ങൾക്ക് അടിസ്ഥാന നിരക്കുകൾ നിശ്ചയിക്കണം എന്നാണ് ടെലികോം റെഗുലേറ്ററി അതോറിറ്റി ഓഫ് ഇന്ത്യയുടെ നിലപാട്.

വോഡഫോൺ ഐഡിയയുടെയും 4ജി ഉപഭോക്താക്കളുടെ എണ്ണത്തിൽ വര്‍ധനയുണ്ട്. സെപ്റ്റംബര്‍ 30ന് 10.46 കോടി ഉപഭോക്താക്കൾ ആണ് ഉള്ളത്. ഒരു ഉപഭോക്താവിൽ നിന്നുള്ള ശരാശരി വരുമാനം 114-ഷ നിന്ന് 119 രൂപയായി ഉയര്‍ന്നിട്ടുണ്ട്. അതേസമയം മൊത്തം ഉപഭോക്താക്കൾ 27.18 കോടിയായി കുറഞ്ഞു. ജൂൺ വരെയുള്ള മൂന്ന് മാസങ്ങളിൽ ഇത് 27.98 കോടിയായിരുന്നു