മതങ്ങള്‍ തൊഴിലവസരങ്ങള്‍ സൃഷ്​ടിക്കുന്നില്ല: സാം പിത്രോദ

ഗാന്ധിനഗര്‍: മതങ്ങളല്ല ശാസ്ത്രമാണ് തൊഴിലവസരങ്ങള്‍ സൃഷ്ടിക്കുകയെന്നും, ഇത് മനസ്സിലാക്കാതെ നേതാക്കന്മാര്‍ യുവതലമുറയെ തെറ്റിദ്ധരിപ്പിച്ചുകൊണ്ടിരിക്കുകയാണെന്നും സാങ്കേതികവിദഗ്ധനും സംരംഭകനുമായ സാം പിത്രോദ. ശാസ്ത്രമാണ് തൊഴിലവസരങ്ങള്‍ സൃഷ്ടിക്കാന്‍ പോകുന്നത്. തൊഴിലവസരങ്ങളെ കുറിച്ച്‌ ഒരാള്‍ പറയുമ്പോൾ അതിന് എപ്പോഴും രാഷ്ട്രീയ മാനം കൂടി വരുന്നുണ്ട്. അതില്‍ അലങ്കാരങ്ങള്‍ കൂടുതലും യാഥാര്‍ഥ്യം വളരെ കുറവുമായിരിക്കുമെന്നും പിത്രോദ പറഞ്ഞു

'ക്ഷേത്രം,മതം,ദൈവം,ജാതി തുടങ്ങി രാജ്യത്ത് സജീവമാകുന്ന ചര്‍ച്ചകളെക്കുറിച്ച്‌ കേള്‍ക്കുമ്പോൾ രാജ്യത്തെക്കുറിച്ച്‌ ഞാന്‍ ആശങ്കപ്പെടുകയാണ്. നാളേക്ക് വേണ്ടി മഹത്തായ തൊഴിലവസരങ്ങള്‍ സൃഷ്ടിക്കാന്‍ പോവുന്നത് അമ്പലങ്ങളല്ല. ഭാവി സൃഷ്ടിക്കപ്പെടുന്നത് ശാസ്ത്രത്തിലൂടെയായിരിക്കും. 'കര്‍ണാവതി സര്‍വ്വകലാശാല യൂത്ത് പാര്‍ലമെന്റില്‍ സംസാരിക്കവേ പിത്രോദ പറഞ്ഞു.എന്നാല്‍ ശാസ്ത്രത്തെ കുറിച്ച്‌ വളരെ കുറച്ച്‌ ചര്‍ച്ചകള്‍ മാത്രമേ പൊതു സമൂഹത്തില്‍ നടക്കുന്നുള്ളൂവെന്നും അദ്ദേഹം കൂട്ടിച്ചേര്‍ത്തു.