ന്യൂഡൽഹി: പ്രമുഖ മാനേജ്മെൻറ് പഠന കേന്ദ്രമായ ഐഐഎം കൊൽക്കത്തയിലെ എംബിഎ വിദ്യാര്ത്ഥികൾ എല്ലാം സന്തോഷത്തിലാണ്. കാരണമെന്താണെന്നോ? അവസാന വര്ഷ എംബിഎ വിദ്യാര്ത്ഥികളുടെ പ്ലേസ്മെൻറ് പൂര്ത്തിയായപ്പോൾ എല്ലാ വിദ്യാര്ത്ഥികൾക്കും മികച്ച ശമ്പളത്തിൽ ജോലി കിട്ടി എന്നതു തന്നെ.
28 ലക്ഷം രൂപയാണ് ഐഐഎമ്മിലെ മിടുക്കൻമാരുടെ തുടക്കത്തിലെ ശരാശരി വാര്ഷിക ശമ്പളം. ഇവരിൽ തന്നെ 54.5 ലക്ഷം രൂപയോളം വാര്ഷിക ശമ്പളം ഓഫര് ചെയ്യപ്പെട്ട മിടുമിടുക്കൻമാരും ഉണ്ടെന്നതും ശ്രദ്ധേയം.
Also Read: ഭൂമിയുടെ യഥാർത്ത മൂല്യം കണക്കാക്കി മാത്രം റിയൽ എസ്റ്റേറ്റിൽ നിക്ഷേപിയ്ക്കാം
പ്ലേസ്മെൻറിൽ പങ്കെടുത്ത 136 കമ്പനികൾ ചേര്ന്ന് 439 വിദ്യാര്ത്ഥികൾക്ക് നൽകിയത് 492-ഓളം ജോബ് ഓഫറുകൾ. കൺസൾട്ടിങ് മേഖലയിൽ നിന്നായിരുന്നു ജോബ് ഓഫറുകളിൽ അധികവും. ഇക്വിറ്റി, പ്രൊഡക്ട് മാനേജ്മെൻറ്, ഐടി, അനലിറ്റിക്സ് തുടങ്ങിയ മേഖലകളിൽ നിന്നും തൊഴിലുകൾ വാഗ്ദാനം ചെയ്യപ്പെട്ടു.
ബോസ്റ്റൻ കൺസൾട്ടിങ് ഗ്രൂപ്പ്, മക്കിൻസേ ആൻഡ് കമ്പനി, ബെയിൻ ആൻഡ് കമ്പനി, ഗോൾഡ്മാൻ സാച്ചസ്, ടിഎഎസ്, ആദിത്യ ബിര്ള ഗ്രൂപ്പ്, മഹീന്ദ്ര ആൻഡ് മഹീന്ദ്ര തുടങ്ങിയവയാണ് തൊഴിലവസരങ്ങൾ വാഗ്ദാനം ചെയ്ത പ്രമുഖ കമ്പനികൾ.