ലോകത്തെ ഏറ്റവും ഉയര്‍ന്ന ടിക്കറ്റ് നിരക്കുള്ള വിമാനം

ലോകത്തെ ഏറ്റവും ഉയര്‍ന്ന ടിക്കറ്റ് നിരക്കുള്ള ആദ്യവിമാനം കഴിഞ്ഞ ഞായറാഴ്ച അബുദാബിയില്‍നിന്നു മുംബൈ ഛത്രപതി ശിവാജി വിമാനത്താവളത്തില്‍ ഇറങ്ങി. മുംബൈയില്‍ നിന്നു ന്യൂയോര്‍ക്ക് വരെ വീട്ടിലെപ്പോലെ ഉറങ്ങിപ്പോകാന്‍ ഇത്തിഹാദ് എയര്‍വേയ്‍സിൻറെ എയര്‍ബസ് എ 380ൽ സാധിക്കും. ഇതിന് ചെലവാകുക 25.22 ലക്ഷം രൂപ. എയര്‍ബസ് എ 380ല്‍ ദ് റസിഡന്‍സ് എന്നു പേരിട്ട ആഡംബര സീറ്റ് ക്രമീകരണത്തിലൂടെയാണ് ഇത് സാധ്യമാവുക.

സ്വീകരണ മുറി, രണ്ടു പേര്‍ക്കുള്ള കിടപ്പുമുറി, കുളിമുറി എന്നീ സൗകര്യങ്ങളുള്ളതാണ് ഈ സീറ്റ്. ഇത്തിഹാദിന്റെ, ആഡംബര സ്വീറ്റില്‍ അബുദാബി- മുംബൈ യാത്രയ്ക്കു ചെലവ് വരിക 3.31 ലക്ഷം രൂപയാണ്. മുംബൈ- ലണ്ടന്‍ യാത്രയ്ക്ക് 17. 25 ലക്ഷം രൂപ.


മുംബൈയില്‍ നിന്നുള്ള ഈ പ്രതിദിന സര്‍വീസ് ലണ്ടന്‍, അബുദാബി, ന്യൂയോര്‍ക്ക് വിമാനത്താവളങ്ങളെ ബന്ധിപ്പിക്കുന്നു. രണ്ടു പേര്‍ക്കുള്ള ദ് റസിഡന്‍സ് സൗകര്യമാണ് വിമാനത്തിലുള്ളത്. ഒന്‍പത് ഫസ്റ്റ് അപ്പാര്‍ട്മെന്റുകള്‍, 70 ബിസിനസ് സ്റ്റുഡിയോ, 415 ഇക്കോണമി സ്മാര്‍ട് സീറ്റുകള്‍ ഉള്‍പ്പെടെ 496 യാത്രക്കാര്‍ക്കു സഞ്ചരിക്കാവുന്ന വിമാനമാണ് എ 380.