ഗൂഗിൾ ക്ലൗഡ് സിഇഓ ഡയാന ഗ്രീൻ സ്ഥാനമൊഴിഞ്ഞു; പുതിയ സിഇഒ മലയാളി

ഗൂഗിള്‍ ക്ലൗഡിന്‍റെ പുതിയ സിഇഓ ആയി മലയാളിയായ തോമസ് കുര്യൻ സ്ഥാനമേറ്റു. കോട്ടയം സ്വദേശിയാണ് തോമസ് കുര്യൻ. ഗൂഗിള്‍ ക്ലൗഡ് സിഇഓ ആയ ഡയാന ഗ്രീൻ സ്ഥാനമൊഴിഞ്ഞതോടെയാണ് തോമസ് കുര്യൻ സ്ഥാനമേറ്റത്. ഒറാക്കിള്‍ കോര്‍പ്പറേഷന്‍റെ പ്രൊഡക്ട് ഡവലപ്മെന്‍റ് പ്രസിഡന്‍റായിരുന്ന തോമസ് കുര്യൻ ഒക്ടോബറിൽ സ്ഥാനമൊഴിഞ്ഞിരുന്നു.

ക്ലൗഡ് കംപ്യൂട്ടിങ് മേഖലയിൽ കൂടുതൽ സോഫ്റ്റ്‍‍വെയറുകള്‍ വികസിപ്പിക്കണമെന്ന തോമസ് കുര്യൻ്റെ നിര്‍ദേശം ഒറാക്കിള്‍ കോര്‍പ്പറേഷനിൽ അംഗീകരിക്കപ്പെട്ടിരുന്നില്ല. ഗൂഗിള്‍ ക്ലൗഡിൽ തന്‍റെ ലക്ഷ്യം പൂര്‍ത്തീകരിക്കുകയായിരിക്കും തോമസ് കുര്യൻ്റെ ലക്ഷ്യം. ആമസോൺ, മൈക്രോസോഫ്റ്റ് തുടങ്ങിയ കമ്പനികളാണ് ഈ മേഖലയിൽ ഗൂഗിളിന്‍റെ എതിരാളികള്‍.

മൂന്ന് വര്‍ഷത്തിനു ശേഷമാണ് ഗൂഗിള്‍ ക്ലൗഡ് സിഇഓ സ്ഥാനത്തു നിന്ന് ഡയാന ഗ്രീൻ സ്ഥാനമൊഴിഞ്ഞത്. 2012 മുതൽ ഗൂഗിളിന്‍റെ മാതൃസ്ഥാപനമായ ആൽഫാബൈറ്റിന്‍റെ ഡയറക്ടര്‍മാരിലൊരാളാണ് ഡയാന ഗ്രീൻ. നവംബര്‍ 26ന് ഗൂഗിള്‍ ക്ലൗഡിൽ ചേരുന്ന തോമസ് കുര്യൻ 2019 ആദ്യം സിഇഓ ആയി ചുമതലയേൽക്കും.