അഷേറ പൂച്ച
ലോകത്തെ ഏറ്റവും മൂല്യമേറിയ പൂച്ച വിഭാഗം. ആഫ്രിക്കന്‍ കാട്ടുപൂച്ചയുടെയും ഏഷ്യന്‍ പുള്ളിപ്പുലിയുടെയും സങ്കരയിനമാണ് അഷേറ. ഈയിനത്തിലുള്ള പൂച്ചകളെ വികസിപ്പിച്ചിട്ട് 20 വര്‍ഷമേ ആകുന്നുള്ളു. 2008ല്‍ ഈയിനം പൂച്ചകളെ വികസിപ്പിക്കുന്നത് നിര്‍ത്തി. അഞ്ചടിയോളം പൊക്കം വയ്ക്കുന്ന പൂച്ചയ്ക്ക് 11 മുതല്‍ 15 കിലോ വരെ ഭാരമുണ്ടാകും. ആക്രമണ സ്വഭാവമാണ് പൂച്ചയുടെ ഉല്‍പ്പാദനം നിര്‍ത്താനുള്ള കാരണം. 11- 75 ലക്ഷം രൂപ വരെയാണ് പൂച്ചകളുടെ വില.
സവന്ന പൂച്ച
വികസിപ്പിച്ചെടുത്ത ഇനം തന്നെയാണ്. ഒതുക്കമുള്ള ശരീരവും ഉയരവുമാണ് പ്രധാന ആകര്‍ഷണം. ചെവികളുടെ ഉയര്‍ന്ന ആകൃതിയും പ്രത്യേകതയാണ്. നാട്ടുപൂച്ചയുടെയും ആഫ്രിക്കന്‍ കാട്ടു പൂച്ചയുടെയും സങ്കരയിനം. 14- 17 ഇഞ്ച് ഉയരം. 6- 12 കിലോ ഭാരം. 12- 20 വര്‍ഷം ആയുസ്. വലിയ കൂര്‍ത്ത ചെവികള്‍ക്കും പൊന്‍, വെള്ളി അല്ലെങ്കില്‍ കറുത്ത സ്‌മോക്ക് കോട്ടും മറ്റു പൂച്ചകളില്‍ നിന്നു സവന്ന വിഭാഗത്തെ വ്യത്യസ്തമാക്കുന്നു. 2012ലാണ് ഇന്റര്‍നാഷണല്‍ ക്യാറ്റ് അസോസിയേഷന്‍ (TICA) സവന്ന വിഭാഗത്തെ അംഗീകരിച്ചത്. ഒരു ലക്ഷം മുതല്‍ 40 ലക്ഷം രൂപ വരെയാണ് വില.
പീറ്റര്‍ബ്ലാഡ് പൂച്ച
രോമമില്ലാത്ത പൂച്ചകളിലെ പുതുതലമുറക്കാരന്‍. റക്ഷ്യയാണ് സ്വദേശം. ഡോണ്‍ സ്ഫിങ്ക്‌സ് എന്നും അറിയപ്പെടുന്നു. 8- 12 ഇഞ്ചാണ് ഉയരം. 3- 6 കിലോ ഭാരം വയ്ക്കും. 12- 15 വര്‍ഷമാണ് ആയുസ്. എല്ലാവരോടും പെട്ടെന്നു ഇണങ്ങുന്ന സ്വഭാവം. നിരവധി നിറങ്ങളില്‍ കാണപ്പെടുന്നു. വീട്ടിനുള്ളില്‍ വളര്‍ത്തുന്ന ഇനം. സ്ഫിങ്ക്‌സ് പൂച്ചയോട് സാദൃശ്യം. 85000 രൂപ മുതല്‍ 3.5 ലക്ഷം രൂപ വരെയാണ് വില.
സ്ഫിങ്ക്‌സ് പൂച്ച
ലോകത്ത് രോമമില്ലാത്ത പൂച്ചകളിലെ പ്രമുഖന്‍. ആരോഗ്യപരമായി നിരന്തരം പ്രശ്‌നങ്ങളുള്ള ഇനമാണിത്. കാനഡയാണ് സ്വദേശം. 8-10 ഇഞ്ച് ഉയരം. 3- 6 കിലോ ഭാരം. 9- 15 വര്‍ഷം ആയുസ്. രോമമില്ലാത്തതിനാല്‍ തന്നെ വീടുകള്‍ക്കുള്ളില്‍ മാത്രമേ വളര്‍ത്താന്‍ സാധിക്കൂ. ആളുകളോടും കുട്ടികളോടും വളരെ ഇണങ്ങി ജീവിക്കുന്ന പ്രകൃതമാണ്. ചൂട് തേടുന്ന സ്വഭാവത്തിന് പ്രശസ്തരാണ്. സാധാരണ കമ്പ്യൂട്ടറുകളുടെയോ ടെലിവിഷനുകളുടെയോ മുകളിലാണ് സ്ഥാനം പടക്കാറുള്ളത്. 36,000 മുതല്‍ 2.5 ലക്ഷം രൂപ വരെയാണ് വില.
പേർഷ്യൻ
ലോക പ്രശസ്തമായ പൂച്ച വിഭാഗം. ഏറ്റവും കൂടുതൽ ആരാധകരുള്ള വിഭാഗവും ഇതുതന്നെ. രോമാവൃതമായ ശരീരമാണ് പ്രധാന ആകർഷണം. പഞ്ഞിക്കെട്ടു പോലെ ഇരിക്കും. വിവധ നിറങ്ങളിൽ ലഭ്യമാണ്. കുട്ടികളുമായി പെട്ടെന്ന് ഇണങ്ങും. 10- 15 ഇഞ്ചാണ് ഉയരം. 3- 6 കിലോ ഭാരം വയ്ക്കും. 10- 15 വർഷമാണ് ആയുസ്. 1600കൾ മുതൽ പ്രചാരത്തിലുണ്ട്. പെക്കിംഗീസ് നായ വർഗവുമായി വളരെ സാമ്യമുള്ള ഇനമാണ്. തരതമ്യേന വിലക്കുറവാണ്. 30,000 മുതൽ നാലു ലക്ഷം വരെ വിലയുണ്ട്.