നിക്ഷേപകർക്ക് ആശ്വാസം; തിരിച്ചു കയറി ഓഹരി വിപണി

മുംബൈ: കൊറോണ സൃഷ്ടിച്ച അനിശ്ചിതത്വങ്ങൾക്ക് ശേഷം തിരിച്ചു വരവിൻറെ സൂചനകൾ നൽകി ഓഹരി വിപണി. മുംബൈ സ്റ്റോക്ക് എക്സ്ചേഞ്ച് സൂചികയ സെൻസെക്സ് 1,627.73പോയിൻറുകൾ ഉയർന്ന്29,915.96എന്ന നിലവാരത്തിലാണ് വ്യാപാരം അവസാനിപ്പിച്ചത്. നാഷണൽ സ്റ്റോക്ക് എക്സ്ചേഞ്ച് സൂചികയായ നിഫ്റ്റി 482 പോയിൻറുകൾ ഉയർന്ന് 8745.45 എന്ന നിലവാരത്തിലാണ് വ്യാപാരം അവസാനിപ്പിച്ചത്.

ഒഎൻജിസി, ടിസിഎസ്, ഗെയിൽ, വിപ്രോ. ഹിന്ദുസ്ഥാൻ യൂണീലിവർ, റിലയൻസ് ഇൻഡസ്ട്രീസ് തുടങ്ങിയവയുടെ എല്ലാം ഓഹരികൾ നേട്ടത്തിലാണ്. അതേസമയം എച്ച്ഡിഎഫ്സി ബാങ്ക്, ഐസിഐസിഐ ബാങ്ക് തുടങ്ങിയ ഓഹരികൾ നഷ്ടത്തിലാണ്.

Also Read: സ്വർണ വിലയിൽ മാറ്റമില്ല; ഇന്നത്തെ വില അറിയാം

കൊറോണ സൃഷ്ടിച്ച അനിശ്ചിതത്വത്തിൽ തകർന്ന ഓഹരി വിപണിയ്ക്ക് രാജ്യത്തെ അഭിസംബോധന ചെയ്ത പ്രധാനമന്ത്രിയുടെ വാക്കുകൾ ഉത്തേജനം നൽകി. ധനമന്ത്രി നിർമലാ സീതാരാമൻറെ നേതൃത്വത്തിൽ പ്രത്യേക ഇക്കണോമിക് റെസ്പോൺസ് ടാസ്ക് ഫോഴ്സ് രൂപീകരിയ്ക്കും എന്ന പ്രഖ്യാപനമാണ് കൂടുതൽ ഉത്തേജനം നൽകിയത്.

മറ്റ് ഏഷ്യൻ വിപണികളിലും സൂചികകളിൽ ഉണർവ്വ് പ്രകടമാണ്. അമേരിക്കൻ സൂചികയായ ഡൌ ജോൺസിൽ 0.95 ശതമാനം ഉയർന്നാണ് വ്യാപാരം നടക്കുന്നത്. കൊറോണ വൈറസിനെ പ്രതിരോധിയ്ക്കാൻ പ്രഖ്യാപിച്ചിരിയ്ക്കുന്ന സാമ്പത്തിക ഉത്തേജന പദ്ധതികളാണ് പൊതുവേ വിപണിയ്ക്ക് ഗുണകരമായത്.