ഇനി കുറഞ്ഞ നിരക്കിൽ ഊബറിൻെറ റെൻറൽ ഓട്ടോ

കൊച്ചി: ഊബര്‍ രാജ്യത്ത് റെൻറൽ ഓട്ടോ സേവനങ്ങൾ ആരംഭിച്ചു. കൊവിഡ് പ്രതിസന്ധി മൂലം ടാക്സി സേവനങ്ങൾ കുറഞ്ഞതിനാൽ ആണ് ഇത്. ഏഷ്യൻ വിപണിയിൽ ഊബര്‍ പിടിച്ചുനിൽക്കാൻ പാടു പെടുകയാണ്. 24 മണിക്കൂറും ലഭ്യമായ ഓട്ടോ റെൻറൽ സേവനമാണ് ഊബര്‍ അവതരിപ്പിയ്ക്കുന്നത്.

ഡൽഹി, മുംബൈ ഉൾപ്പെടയുള്ള ആറു നഗരങ്ങളിൽ ആണ് ആദ്യം സേവനം നൽകുന്നത്. ടാക്സി കാറുകൾ വിളിയ്ക്കുന്നതു പോലെ തന്നെ ആപ്പിലൂടെ ഊബര്‍ ഓട്ടോ ബുക്ക് ചെയ്യാം. യാത്രയിൽ ഉടനീളം വിവിധ സ്ഥലങ്ങളിൽ വണ്ടി നിര്‍ത്തുന്നതിനുള്ള സൗകര്യവും ലഭിയ്ക്കും. ടാക്സി കാറുകളേക്കാൾ ലാഭകരമാകും എന്നതിനാൽ കൂടുതൽ ഉപഭോക്താക്കൾ സേവനം പ്രയോജനപ്പെടുത്തിയേക്കും എന്നാണ് സൂചന.

Also Read: ഡിജിറ്റൽ പെയ്മെൻറ് വിപണി കുതിയ്ക്കുന്നു; 2025-ഓടെ വരുന്നത് മൂന്ന് മടങ്ങ് വര്‍ധന

രാജ്യത്തെ ഓട്ടോക്കാരും ആയി സഹകരിച്ച് സേവനം ലഭ്യമാക്കിയേക്കും. ഉപഭോക്താക്കൾക്കായി അധിക സമയം അനുവദിയ്ക്കും എന്നതാണ് പുതിയ റെൻറൽ സര്‍വീസിൻെറ പ്രധാന നേട്ടം. മണിക്കൂറിന് അല്ലെങ്കിൽ കിലോമീറ്ററിന് 149 രൂപ നിരക്കിൽ ആയിരിക്കും സര്‍വീസ്. കൊവിഡ് പ്രതിസന്ധിയും ലോക്ക് ഡൗണും ഒക്കെ മൂലം അത്യാവശ്യ കാര്യങ്ങൾക്ക് മാത്രമേ ആളുകൾ പുറത്തിറങ്ങിയിരുന്നുള്ളു എന്നത് ഊബര്‍, ഒല തുടങ്ങിയ ഓൺലൈൻ ക്യാബ് കമ്പനികളെ പ്രതിസന്ധിയിൽ ആക്കിയിരുന്നു. ഗണ്യമായി ബിസിനസ് കുറഞ്ഞു.

അടുത്തിടെയായി സ്വകാര്യ ആവശ്യങ്ങൾക്കായി സ്വന്തം വാഹനങ്ങളെ ആശ്രയിക്കുന്നവര്‍ വര്‍ധിച്ചു. യൂസ്ഡ് കാറുകളുടെ വിൽപ്പനയും ഉയര്‍ന്നിട്ടുണ്ട്. ഇതാണ് ടാക്സി കമ്പനികളെ പ്രതിസന്ധിയിൽ ആക്കിയത്.
ഈ സമയത്താണ് താരതമ്യേന കുറഞ്ഞ നിരക്കിൽ ഓട്ടോ ടാക്സി സര്‍വീസുമായി ഊബര്‍ രംഗത്ത് എത്തിയിരിക്കുന്നത്.