ലോക്ക്ഡൗൺ ഇളവ്; സിനിമ തിയേറ്ററുകൾ അടുത്ത മാസം തുറന്നേക്കും

ഡൽഹി: രാജ്യത്ത് നാലാംഘട്ട ലോക്ക് ഡൗൺ ഇളവുകൾ അടുത്തമാസം ഒന്നു മുതൽ ആരംഭിക്കുമെന്ന് റിപ്പോർട്ട്. ഇതുസംബന്ധിച്ച മാർഗനിർദ്ദേശങ്ങൾ ഓണത്തിന് മുമ്പ് പുറത്തിറങ്ങും. നാലാംഘട്ട അൺലോക്കിൽ രാജ്യത്തെ തിയേറ്ററുകൾ തുറക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. തിയേറ്ററുകൾ തുറക്കുന്നത് സംബന്ധിച്ച് സെക്രട്ടറിമാരുടെ ഉന്നതാധികാര സമിതി കേന്ദ്ര സർക്കാറിന് ശുപാർശ നൽകി. തൊഴിൽ നഷ്ടം കണക്കിലെടുത്താണ് ശുപാർശ നൽകിയത്.

സാമൂഹിക അകലം പാലിക്കണമെന്നത് ഉൾപ്പടെയുള്ള കർശന നിർദ്ദേശ പ്രകാരമായിരിക്കും അടുത്ത മാസം മുതൽ സിനിമ ഹാളുകൾ തുറക്കാൻ കേന്ദ്രം അനുമതി നൽകുക. തിയേറ്ററുകൾക്കായുള്ള സ്റ്റാൻഡേർഡ് ഓപ്പറേറ്റിംഗ് നടപടിക്രമത്തിൽ മാറ്റം വരുത്തും. ഇതനുസരിച്ച് സാമൂഹിക അകലം പാലിച്ച് മൂന്ന് സീറ്റ് ഇടവിട്ടായിരിക്കും ആളുകളെ ഇരിത്തുക. അതായത് രണ്ട് പേർക്കും ഒരു കുടുംബത്തിനും അടുത്തടുത്ത് ഒരുമിച്ച് ഇരിക്കാനാകും.

Also Read: മാനസികരോഗങ്ങൾക്ക് ഇൻഷുറൻസ് പരിരക്ഷ; നിങ്ങൾ‌ അറിയേണ്ട കാര്യങ്ങൾ

സിനിമ ഹാളിനുള്ളിലെ വായുവിന്റെ താപനില 24 ഡിഗ്രിയോ അതിൽ കൂടുതലോ ആയിരിക്കണം. ഉപയോക്താക്കൾ നിർബന്ധമായും മാസ്ക് ധരിച്ചിരിക്കണം. ഇടവേള സമയത്ത് കൈകളിൽ സാനിറ്റൈസർ തളിക്കുന്നതിനെക്കുറിച്ച് ഓർമ്മപ്പെടുത്തണം. ഇതിനായി സ്ക്രീനിൽ അവബോധ സന്ദേശങ്ങൾ പ്രദർശിപ്പിക്കാം. അതേസമയം തിയേറ്ററുകൾ മാത്രമുള്ള സമുച്ചയങ്ങൾക്കാണ് ആദ്യം അനുമതി നൽകുക. മാളുകളിലെ തിയേറ്ററുകൾക്ക് തൽകാലം അനുമതി ഉണ്ടാകില്ല.