രത്തൻ ടാറ്റയുടെ പിന്തുണയുള്ള ഡിസ്കൗണ്ട് ബ്രോക്കിംഗ് കമ്പനിയായ അപ്സ്റ്റോക്സ് 2022-23 സാമ്പത്തിക വർഷത്തിൽ റെക്കോർഡ് വരുമാനം നേടി. കമ്പനിയുടെ മൊത്തം വരുമാനം 1,000 കോടി രൂപ കടന്നു. 40- ശതമാനമാണ് വരുമാനത്തിലെ വർധന. ഇൻവെസ്റ്റ്മന്റ് മാനേജ്മന്റ് കമ്പനിയായ ടൈഗർ ഗ്ലോബൽ മുഖ്യ നിക്ഷേപകരായ കമ്പനി , അടുത്ത അഞ്ച്-ആറ് വർഷത്തിനുള്ളിൽ ഉപഭോക്തൃ അടിത്തറ 10 കോടിയായി വർധിപ്പിക്കാൻ ലക്ഷ്യമിടുന്നു. 10 മടങ്ങ് വർദ്ധനയാണ് ലക്ഷ്യമിടുന്നത്. സഹസ്ഥാപകനും ചീഫ് എക്സിക്യൂട്ടീവുമായ രവികുമാർ ആണ് ഇക്കാര്യം വ്യക്തമാക്കിയത്.
2009-ൽ സ്ഥാപിച്ച കമ്പനി, രാജ്യത്തുടനീളമുള്ള 1.1 കോടി ഉപഭോക്താക്കൾക്ക് ഇപ്പോൾ സേവനം നൽകുന്നുണ്ട്. ഇതിൽ 85 ശതമാനം പേർ ചെറു നഗരങ്ങളിൽ നിന്നുള്ളവരാണ്. . മുംബൈ, ഡൽഹി, പൂനെ എന്നിവക്കൊപ്പം, താനെ, ബാംഗ്ലൂർ, ജയ്പുർ, ഹൈദരാബാദ്, ഔറംഗബാദ്, നാസിക്, നാഗ്പുർ എന്നിവിടങ്ങളിലാണ് ഏറ്റവും കൂടുതൽ ഉപഭോക്താക്കൾ വിപണിയിലേക്ക് സംഭാവന നൽകുന്നത്.
ഇന്ത്യക്കാരിൽ അഞ്ച് ശതമാനത്തിൽ താഴെ മാത്രമാണ് ഓഹരികളിൽ നിക്ഷേപം നടത്തുന്നത്. ഇന്ത്യൻ വിപണിയിലെ മൊത്തത്തിലുള്ള സാധ്യതകൾ വലിയ തോതിൽ ഇനിയും ഉപയോഗിക്കപ്പെട്ടിട്ടില്ലാത്ത സാഹചര്യത്തിൽ കൂടുതൽ വളർച്ച ലക്ഷ്യമിടുകയാണ് കമ്പനി. കഴിഞ്ഞ 18 മാസങ്ങളിൽ, കമ്പനി ഇന്ത്യൻ വിപണിയിൽ ശ്രദ്ധ കേന്ദ്രീകരിക്കാൻ തീരുമാനിക്കുകയും പ്രാദേശികമായി ബിസിനസ് വളർത്തുന്നതിന് മുൻഗണന നൽകുകയും ചെയ്തിട്ടുണ്ട്..