ബോണസ് തുക വിനിയോഗിക്കാം; അല്‍പ്പം ശ്രദ്ധയോടെ

ജോലിക്കാരെ സംബന്ധിച്ചിടത്തോളം ബോണസ് അല്ലെങ്കില്‍ ഉത്സവബത്ത കിട്ടുന്നത് സന്തോഷകരമായ കാര്യമാണ്. പ്രതിമാസ ശമ്പളത്തിന് പുറമെ കിട്ടുന്ന ബോണസ് മുന്‍നിര്‍ത്തി മിക്കവരും നേരത്തെ തന്നെ പല പ്ലാനുകളും മുന്‍കൂട്ടി തയ്യാറാക്കാറുമുണ്ട്. പുതിയ ഫര്‍ണിച്ചര്‍, ഇലക്ട്രോണിക് ഉത്പന്നങ്ങള്‍ അങ്ങനെ.. അങ്ങനെ..

എന്തായാലും ഭവന വായ്പ, വാഹന വായ്പ തുടങ്ങി പ്രതിമാസം പല ഇ.എം.ഐകള്‍ ഉള്ളവര്‍ക്കും എണ്ണിച്ചുട്ട അപ്പം പോലുള്ള ശമ്പളത്തുക കൊണ്ട് വീട്ടു ചിലവുകള്‍ നടത്താന്‍ പ്രയാസപ്പെടുന്നവര്‍ക്കും ഒക്കെ ബോണസ് ആശ്വാസമാണ്. ചെറിയ തുക മുതല്‍ ഒരു മാസത്തെ ശമ്പളത്തുക വരെ ബോണസായി ലഭിക്കുന്നവര്‍ അല്‍പ്പം ശ്രദ്ധയോടെ വിനിയോഗിച്ചാല്‍ ഇത് ഭാവി ആവശ്യങ്ങള്‍ക്കായി ഉപകരിക്കും. മറ്റ് അത്യാവശ്യങ്ങള്‍ ഇല്ലെങ്കില്‍ ദീര്‍ഘകാല സമ്പത്ത് വര്‍ധനയ്ക്കായി തന്നെ തുക വിനിയോഗിക്കാം

റിട്ടയര്‍മെന്‍റ് ഫണ്ടുകളില്‍ നിക്ഷേപിക്കാം

ഭാവിയിലെ ആവശ്യങ്ങള്‍ക്കായുള്ള റിട്ടയര്‍മെന്‍റ് പ്ലാനുകള്‍, എന്‍.പി.എസ് തുടങ്ങിയവയിലൊക്കെ നിക്ഷേപം നടത്തുന്നതിന് ബോണസ് തുക വിനിയോഗിക്കാം. ഇത്തരം പ്ലാനുകളില്‍ സ്ഥിരമായി തന്നെ നിക്ഷേപം നടത്തേണ്ടതുണ്ടെന്നത് മുന്നില്‍ കണ്ടു വേണം നിക്ഷേപം. നിലവില്‍ ഉള്ള ഫണ്ടുകളില്‍ അധിക നിക്ഷേപം നടത്താന്‍ ഓപ്ഷന്‍ ഉണ്ടെങ്കില്‍ അതും പ്രയോജനപ്പെടുത്താം. പ്രൊവിഡന്‍റ് ഫണ്ട് ഉള്‍പ്പെടെയുള്ള നിക്ഷേപ മാര്‍ഗങ്ങളെ കുറിച്ചും ആലോചിക്കാവുന്നതാണ്.

എസ്.ഐ.പി തുടങ്ങാം

മ്യൂച്വല്‍ ഫണ്ടുകളിലും ഓഹരികളിലും ഒക്കെ നിക്ഷേപം നടത്താന്‍ ആഗ്രഹിക്കുന്നവര്‍ക്ക് ബോണസ് തുക ഉപയോഗിച്ച് നിക്ഷേപം നടത്താവുന്നതാണ്. ദീര്‍ഘ കാലാടിസ്ഥാനത്തില്‍ സമ്പത്ത് വര്‍ധനയ്ക്ക് ഉപകരിക്കുന്ന മികച്ച എസ്.ഐ.പികളില്‍ പ്രതിമാസം 500 രൂപ മുതല്‍ നിക്ഷേപിക്കാന്‍ അവസരം ഉണ്ടെന്ന് മനസിലാക്കി ഇത്തരം വഴികളെ കുറിച്ച് ആലോചിക്കാം.
മികച്ച ഇക്വിറ്റി മ്യൂച്വല്‍ ഫണ്ടുകളിലാണ് നിക്ഷേപം നടത്തുന്നതെന്ന് ഉറപ്പാക്കിയിരിക്കണം എന്നു മാത്രം. ചെറിയ കാലയളവിലെ നിക്ഷേപത്തേക്കാള്‍ ദീര്‍ഘകാല നിക്ഷേപമാകും ഫലപ്രദം. വിപണിയിലെ പ്രകടനം, ലാഭം,ഭാവി സാധ്യതകള്‍, ബാലന്‍സ് ഷീറ്റ് എന്നിവയൊക്കെ വില ഇരുത്തി മികച്ച കമ്പനികളുടെ ഓഹരികള്‍ നിക്ഷേപത്തിനായി തിരഞ്ഞെടുക്കാവുന്നതാണ്.

എമര്‍ജന്‍സി ഫണ്ട് കരുതാം

ആശുപത്രി ആവശ്യങ്ങള്‍, കുട്ടികളുടെ ആവശ്യങ്ങള്‍ തുടങ്ങി പെട്ടെന്ന് ഒരു അത്യാവശ്യം ഉണ്ടായാല്‍ കൈയില്‍ പണം ആവശ്യമാണ്. നിത്യേനയുള്ള ചിലവുകള്‍ക്കിടയില്‍ കാര്യമായി മിച്ചം പിടിക്കാന്‍ ഒന്നും ഇല്ലാത്തവരെ സംബന്ധിച്ചിടത്തോളം അധികം ലഭിക്കുന്ന ഓരോ രൂപയും പ്രധാനപ്പെട്ടതാണ്. മാറ്റി വയ്ക്കാവുന്ന ആവശ്യങ്ങള്‍ മാത്രമാണ് ഉള്ളതെങ്കില്‍ ഇത്തരക്കാര്‍ക്ക് ഈ തുക ഒരു എമര്‍ജന്‍സി ഫണ്ടായി നിക്ഷേപിക്കാം. പെട്ടെന്ന് ഒരു ആവശ്യം ഉണ്ടാകുമ്പോള്‍ പണം പിന്‍വലിക്കാനാകുന്ന തരത്തില്‍ സേവിങ്സ് അക്കൗണ്ടുകളിലോ മറ്റോ ആയിരിക്കണം നിക്ഷേപം എന്നു മാത്രം.

കട ബാധ്യതകള്‍ തീര്‍ക്കാംപ്രീ പെയ്മെന്‍റ് ഓപ്ഷന്‍ ഉള്ള വായ്പകളുടെ തിരിച്ചടവിന് ബോണസ് തുക വിനിയോഗിക്കാവുന്നതാണ്.മറ്റ് കടബാധ്യതകളോ വായ്പകളോ ഉണ്ടെങ്കിലും ബാധ്യതകള്‍ തീര്‍ക്കുന്നതിനോ ലഘൂകരിക്കുന്നതിനോ ഒക്കെ തന്നെയാവണം ബോണസ് തുക ലഭിക്കുമ്പോള്‍ പ്രാധാന്യം നല്‍കേണ്ടത് .